Aizawl, the 26^th of May, 2025: New Delhi-a zin mek Pu Lalnghinglova Hmar, Minister of State, Sports & Youth Services Department chuan vawiin khan Dr. Mansukh Mandaviya, Union Minister for Youth Affairs & Sports chu Tughlaq Road, New Delhi-a a chenna inah a hmu a, Mizoram in sports leh skill development kaihkawp a tum chungchang leh, football infrastructure tihhmasawn dan tur chungchang an sawi dun.

Mizoram Sports Minister Pu Lalnghinglova Hmar chuan sports coaching leh training chu skill inzirtirna pawimawh tak a nih angin, Mizoramin skill development leh sports kaihkawp turin hma a la mek tih a sawi a. Hemi atan hian Ministry of Skill Development & Entrepreneurship hnuaia Sports, Physical Education, Fitness and Leisure Skills Council (SPEFL-SC) kaltlangin project thehluh tawh a nih thu leh, MSDE Minister leh Secretary bakah SPEFL-SC CEO te nen pawh an thlirho tawh thu Union Sports Minister hi a hrilh a ni.

Union Minister leh Mizoram Minister te hian project proposal pawh an thlirdun nghal a. Union Sports Minister chuan pilot project anga kalpui thuai theih nise a duh thu sawiin, MSDE Minister Pu Jayant Chaudhary pawh a lo sawipui tur thu Pu Lalnghinglova Hmar hi a lo hrilh a ni.

Sports leh Skill kaihkawp hi Mizoram sawrkarin Olympic 2036 vision a neih denchhena kalpui tum a ni a. Coach te tan ‘Training of Trainers buatsaih’ te, sawrkar school a Physical Education zirtirtute training pek a physical education mumal tak kalpui te, state pum huapa naupang zawk te tan sports coaching leh talent zawnchhuah kalpui te a tel a ni.

Pu Lalnghinglova Hmar chuan hmar chhak leh Mizoram in Sports lama hma a sawn theihna turin corporate liante inthlunzawm a țhat thu a sawi chu Union Sports Minister hian hma a lakpui tur thu a lo hrilh a ni.

LESDE Minister ni bawk Pu Lalnghinglova Hmar chuan Pu Atul Kumar Tiwari, Secretary to Government of India, MSDE pawh a office-ah hmuin, sports leh skill development kaihkawpna tur project proposal-a belh leh siamthat ngai lai te an sawidun a ni.

Attachment