Aizawl, the 11^th June 2026: Vawiin khan MSSC chuan Green Mizoram Day, 2026 chu urhsun taka hmangin MSSC enkawl hmunhma hrang hrangah 'Thing phun hnatlang runpui' neih a ni.

MSSC Green Mizoram Day hnatlang runpui hi batch 2-ah inthenin, Office hmun thute'n MSSC Sports Complex, Muallungthu-ah thing tiak 70 chuang an phun a, Coaching Staff ten heng - Hawla Indoor Stadium, Republic Vengthlang; Mizoram Table Tennis Centre, Mission Veng; Ramhlun Sports Complex-ah te an phun bawk a ni.  

Vawiin-a MSSC hmun hma hrang hranga thing phun thar te-

1. Thlado

2. April

3. Herhse

4. Lamkhuang

5. Tlaizawng

6. Lenhmui

7. Theiria

8. Mualhawih

9. Ashoka

10. Raintree

11. African Tulip

12. Vaube

Khawvel in nasa taka a buaipui Global warming mai bakah Tourism industry thang mek zelah ram pawn leh state dangten Mizoram min hriatna ber pakhat chu Infiamna (sports) a kan hlawhtlinnate hi a nih avangin heng kan infiammite chherchhuahna sports infrastructures te hi tlawh leh en hlawh tur a la ni zel dawn a. Tin, a hmangtu leh Mizo mipui tan ngei pawh hrisel leh hmun nuam zawka buatsaih hi tih makmawh angaiin MSSC chuan ECO-CLUB (Green Initiative) chu a din a, he pawl hian a tul angin heng thing phun te hi uluk takin a vil zui dawn a ni.

Vawiin Green Mizoram Day hlawhtling taka hmang thei tura thing tiak petu Environment, Forests & Climate Change Department, DFO Office, Aizawl Forest Division, New Secretariat Complex, Aizawl chungah MSSC chuan lawmthu a sawi a ni.

Attachment