Dated Aizawl, the 13th January, 2025: Vawiin chawhnu dar 2:00 khan Secretariat Conference Hall-ah Mizoram State Sports Council leh Samagra Shiksha te chuan Sports Minister Pu Lalnghinglova Hmar leh Education Minister Dr.Vanlalthlana hriatpuina hnuaiah Mizoram Sports tihhmasawnna tura Inremna thuthlung (Memorandum of Understanding) an ziak .
Inremna Thuthlung (MoU) hi MSSC aiawh Pu Henry Lalrawnkima, Secretary MSSC leh Samagra Shiksha aiawh Pu Lalthanzira, SPD, Samagra Shiksha ten an ziak a. Sports Minister Pu Lalanghinglova Hmar leh Education Minister Dr.Vanlalthlana te chu hriatpuitu an ni.
Samagra Shiksha hian Grassroots Level Sports Development (GSDP) an kalpui mek a. Tun sawrkar hian Bana kaih Policy hmalakna peng khat a tan Thalaite theihna haichhuahna (Talent Identification) Programme Mizoram pum huapa chak taka kalpui a tum mek bawk a. GSDP hian naupang kum 6-18 a huam a, heng programme pahnih te hi Sports hmasawnna lama hmalakna tur ve ve a nih a vangin, kalpui tum dan leh a huam chin te in ang diak diak lo mahse thawhduna zaia khata (Converge) hmalak hian Mizoram chu Sports-ah hmasawnna sang zawkah a hlan kai ngei beiseina avanga Inremna thuthlung hi ziah a ni, Minister te hian an ti.
Pu Lalnghinglova Hmar chuan Mizoram Flagship Programme “Bana Kaih Policy” kaltlanga nasa taka Sports tihhmasawn nana hmalak tum a ni a. Mizoram pum huapa thalai te theihna haichhuah (Talent identification) programme kalpui tum mek a ni a. Hei hian Mizoram chu Sports a tihhmasawn bakah Olympic 2036 tinzawna kan lo inpuahchahna a ni tel bawk a ni, tiin Samagra Shiksha hnuaia GSDP nen zaikhata luantir hi a remchan bakah changtlung zawk leh chak zawka Sports lama hma kan sawn theihna tur a ni, ka lawm hle a ni, a ti.
Education Minister Dr.Vanlalthlana chuan MSSC leh Samagra Shiksha in MoU an ziak chu lawmawm a tih thu sawiin, Sports Minister nen hian thiantha kan ni a, he thil hi kan lo sawi dun fo tawh thin a, vawiina MoU kan ziak thei hi ka lawm hle a ni. He MoU kaltlang hian kan Sports Fund neih ang ang te pawh awmze neih zawk leh tangkai zawka hmanna kawng a hawnphah dawn a, a phurawm hle a ni, a ti.
Attachment
Written by: N. Vabeiratlua, MIS, Deputy Director
