Aizawl the 25th of January, 2026: Dr. Lalmuanpuia, MF&AS, Mizoram State Sports Council (MSSC) a Finance Secretary hna chelh mek chu ni 22.1.2026 (Ningani) khan an chenna Inah a tlusual palh a. ICU-ah dah ni mah se tha chhuak zo lovin tukin 25.1.2026 zing dar 6:15 kan a boral.
MSSC chuan Dr. Lalmuanpuia, MF&AS hi a ui takzet a ni.
Sports Minister leh President, MSSC ni bawk Pu Lalnghinglova Hmar chuan, Sports hmasawnna tura mi thawh hlawk, sports association hrang hranga inhmang, infiammite tana a hun leh sum ui lova pe chhuak ṭhin, infiammi ṭhahnem takte promote-tu a ni a, mithiam a ni bawk tiin a ui takzet thu a sawi.
Dr. LALMUANPUIA CHANCHIN TAWI
Dr. Lalmuanpuia (Kum 49) hi Pu Hrangthanpuia leh Pi Thangzawni te fa upa ber niin June ni 28, 1977-ah Bungzung khuaah a lo piang a, an unau hi mipa hlir 4 anni a, an upat dan indawt chu hetiang hì a ni.
1) Dr. Lalmuanpuia h/o Josephene Zonunsangi
2) Lalsangzuala h/o Phoibie Lallawmzuali
3) Lalremchhunga h/o Lalchhandami
4) Lalbiakmawia h/o Lalchhanhimi
Kum 2023 March ni 9 khan Josephine Zonunsangi Tuikual South nen Bawngkawn Presbytian Kohhran Biak Inah an innei a. Harsatna hrang hrang avangin innei chhunzawm thei lovín, 2025 kum laihawl vel atang khan an awm hrang ta a ni.
Dr. Muanpuia hi a naupan lai atangin nu leh pa thuawih thei tak leh nungchang tha tak a ní a. Zirna lamah chuan Primary atanga pawl 8 thleng Khawhai-ah a zir a, Class IX leh X Mount Carmel School, Chaltlang, Aizawlah a zir. PU (Sc) leh B.Sc (Physics) St. Anthony's College, Shillong-ah a zova. M.Sc (Physics) NEHU, Shillong-ah First Division-ah zo leh a ni. Kum 2011 khan Ph.D (Physics) MZU atangin a zo leh bawk. Kum 2011 khan Mizoram Finance & Account Service (MF&AS) a inziak tlinga, pakhatna dinhmun a luah nghe nghe. MF&AS hna a zawm hnu lawk hian sorkar sponsored in MBA (Finance), Faridabad (Haryana) ah a zir chhunzawm a, he a zirna programme kaihhnawihah hian US lamah hun engemaw chen a zir chhunzawm leh bawk. Sawrkar hna a zawm hnuin Treasury Officer (Aizawl South), Asst. Director (A&T), Deputy Director (LAD), PS to Finance Minister, Deputy Secretary (Finance) leh chanvo hrang hrang a chelh tawh bawk. Tunah hian Jt. Director-in-Chief, Chief Controller of Account hna a chelh mek a ni.
Infiamna lam hi a tuipui hle a, tunah hian 8th Mizoram State Sport Council (MSSC) ah Finance Secretary a ni mek a. Mizoram Weight Lifting Association ah Treasurer a ni. Mizoram Aero sport Association (MASA) ah Vice President a ni mek bawk. Heng bakah hian Mizo boxer tha te puihna lamah hian thahnem a ngai em em a, a mah pawh a insengso nasa thin hle. Mizo Boxer tha zual eng emawzat an inzir zelna atan Boxing training center ama sum senga buatsaihin hmalam an pan zel theih nan nasa takin a buaipui thin. Mizo Boxer lar tak tak, NT Lalbiakkima, Laldingliana, etc. hi ama promote te zing ami an ni.
Thenrual kawm thiam leh mi ngainat hlawh tak a ni a. Mi zaidam leh mi kawm thiam, a thiante leh chhungkua then leh rual ten a ngaih leh an thlamuanpui em em a ni. Thiante tana inpe zo tak a ni. A thiante zinga mi engemaw zat inneihnaah thianah atang tawh nghe nghe a ni. Mi harsa leh chhumchhia tanpui ngaite tan a tlanchhe ngai lo. Pawl leh thawhpuite tan pawh thlamuanpui awm tak a ni. Amah hian neitu leh ngainatu a ngah hle a ni.
Rawngbawina lamah hian theihtawpa inhmang ve thin a ni a. Shillong Branch KTP ah hun engemaw chen OB leh Committee Member dinhmun a lo chelh tawh thin a ni. Shillong Mizo Kohhran in Mission Field hrang hranga fehchhuah an neih thinah pawh a kul a taiah a tang thin. Hun rei tak Shillongah lehkhazir a awm a nih angin Shillong Mizo Kohhranah rawngbawltu leh neitu ber zing ami a ni a, Sunday School naupang Deptt hrang hrangah ziritirtu a lo ni tawh thin a ni.
A nat dan
Kum 2025 tir lam atang khan BP sang a nei ve tan a. A BP sang avang hian hnar thite a nei thin a, hun engemaw chen chu a lo inenkawi tawh a ni. Ni 22.1.2026 tlaia a chaweikham kutsil tur BP sang luhai chu inveng zo lovin kut silna bula tukverhah chuan tla liam palhin ft 10 vela sangah a tla a. Rang takin damdawi in panpui nghal a ni a. A tuk zing lamah Ebenezer Medical Centre-ah zai nghal niin a thluakah thisen thahnem tak a lo tlinga, thisen tlingte chu lakchhuah a ni a. Harh chhuak leh mai tura beisei laiin hniam lam a pan ta zel a. Vawiin 25.1.2026 zing dar 6:15 khan chatuan ram a pan ta a ni.
Thlamuang takin chawl ang che.
