Dated Aizawl, the 29^th July, 2025 (Thawhlehni): Mizoram State Sports Council in kum 50 a tlin lawmna atana buatsaih, NEXA Motors Yonex-Sunrise MSSC Golden Jubilee Celebration MBA Junior Official Championship 2025 chu Mizoram Badminton Centre, Zuangtui ah vawiin July ni 29, 2025 hian khel tan a ni.

He tournament lian hi Under-11 atanga U-19 inkar category 16-ah khelh a ni a. Player 185 tel in, entry 253 a lut a, match 232 khelh a ni bawk ang. Heng match zawng zawng hi Mizoram Badminton Association YouTube channel ah en theih tura live a pek chhuah a ni. 

He tournament hi State championship anih angin Badminton Association of India (BAI) in a hriatpui inelna a ni a. Hei vang hian India ram hmun hrang hranga badminton academy tha a coaching kal mek Mizoram player tha te pawh an rawn haw khawm hlawm a ni. 

Player enbik tur zingah MBA Senior Official Championship neih zawh taka Men's singles leh Women's singles category-a champion, Vanlalmalsawmzuala leh H. Lalrinhlui te an tel a. Tin, kum 13 mi lek ni chunga Senior category-a final lut thei, Tirza Lalremruati leh kum 15 mi ni chunga Mizoram Badminton khawvel a hming chher tak, Malsawmhlua te pawh an inlan ang. 

He tournament hi NEXA Motors bakah Yonex-Sunrise leh MSSC ten an sponsor a. Tun Zirtawpni lo awm tur hian final khelh a ni ang.

Attachment