Dated Aizawl, the 10th September, 2026: Vawiin chawhma khan Mizoram State Sports Council (MSSC) chuan Mizoram Badminton Association player pahnih(2)- H. Lalthazuala leh Sainunmawia Sailo, tun hnaia international level tournament-a medal hlu tak tak rawn hlawh chhuak te chu Director, Sports & Youth Services Department Office Chamber-ah an medal lawmpuina a nei a, heng Mizo badminton player chhuanawm tak pahnihte hi an kal zelna turah duhsakna a hlan a ni.
H. Lalthazuala hi Cameroon International 2026, September ni 3 atanga ni 6 chhunga Warda, Cameroona neihah Men’s Singles Champion a ni a. Tin, 9th Lagos International Classic 2026, August ni 26 atanga ni 29 chhunga neihah Men’s Singles Runner up a ni bawk. Tunah hian Gopichand Academy, Hyderabad-ah a zir mek a, Chaltlang Badminton Club tan a khel mek bawk a ni.
Sainunmawia Sailo hian Yonex Sunrise India Junior International Grand Prix 2026, August ni 25 atanga ni 30 chhunga Pune, India-a neihah Boy’s Doubles category-ah Bronze Medal a la a ni. Ani hi A-Zone Academy, Hyderabad-ah a zir mek a, Sihphir Badminton Club tan a khel mek bawk a ni.
He hunah hian Mizoram State Sports Council leh Directorate of Sports & Youth Services hotute bakah Mizoram Badminton Association hruaitute an tel a, H. Lalthazuala nu leh pa bakah Sainunmawia Sailo pa te an tel bawk.
Attachment
