“Insawizawi leh taksa vawn uluk hi nitin nunphungah kan neih a pawimawh a, hei hian kan eizawnna leh zirnaah hmasawnna nasa lehzual min thlen ngei ngei ang” – Robert Romawia Royte
Aizawl, 29th August, 2022: Vawiin khan SAI Contact Sports Centre, Mission Vengthlangah a. Sports & Youth Services Minister Pu Robert Romawia Royte chuan khuallian niin he hun hi a hmanpui. Sports & Youth Services Board Vice-Chairman Pu TC Pachhunga, Ex-MLA, SYS Secretary Dr. Lalrozama, IAS, SYS Director Pu Joseph H. Lalramsanga leh official pawimawh dangte bakah Sports Association hrang hrang aiawhten he hun hi an hmanpui bawk a ni.
He hunah hian khuallian Pu Robert Romawia Royte chuan Sports (infiamna) leh zirna hi a kalkawp a ngai a, National Education Policy, 2020 pawhin hei hi a ngai pawimawh em am a ni, a ti a. Tunhma chuan Sports hi Co-Curricular Activity kan ti thin a, tunah erawh chuan Curricular Activity zingah telh a ni tawh a ti.
Pu Robert-a chuan lehkha thiam theih bakah taksa in fit leh hrisel neih a pawimawh tih sawiin, insawizawi leh taksa vawn uluk hi nitin nunphungah kan neih a pawimawh a, hei hi mipui nawlpui anga kan ti thei a nih phawt chuan kan taksa a lo in fit ang a, zirna kawngah leh eizawnna kawngah nasa lehzualin hma min sawn tir bawk ang a, Mizoram ang pawhin kan intodelhna atan taksa in fit kan neih hi a pawimawh takzet a ni, a ti.
Khuallian chuan tunhnai kum 3 chhungin SYS Department hian infiamna ruhrel (sports infrastructure) tihchangtlunna atan cheng nuai 45,000 vel kan hmu tawh a, heng hmang hian kawng hrang hrangin hma kan la mup mjup a, COVID-19 hripui leng vamngin kum 2 chhung duh angin hma kan la chak thei lova, kan dinhmun a ziaawm tak hnu hian theihtawp chhuahin tan kan la a ni, a ti a. Sports discipline hrang hrangah thalaiten hmasawnin India ram leh khawvel huap pawhin hming kan chher chho ta zel hi a lawmawm takzet a, thalai infiammite tan theihtawp kan chhuah zel dawn a ni, a ti.
National Sports Day hi kumtin August 29 ah India mi Hockey khel thiam hmingthang Major Dhyan Chand zahna lantir nan hman thin a ni a, vawiina National Sports Day hmannaah hian Mizo Indigenous Games Association bultumin Mizo infiamna chu hrang hrang inkawibah leh zawnga leilawn dim dim (hmeichhe tan) bakah insuknawr leh khanchhuk atanga invuak thlak (mipa tan) hmanga inelna buatsaih a ni a. Hetah hian NSS, Synod higher Secondary School leh Sports Authority of India (SAI) enkawl lai infiammite telin Group pali – Mualzavata Group, Taitesena Group, Vanapa Group leh Khuangchera Group-ah then an ni a, a pumpuia champion chu Mualzata Group niin “Major Dhyan Chand Trophy” hlan an ni.
Attachment
Written by: Andrew H Lalremruata, MIS, Deputy Director
