New Delhi, the 24^th of May, 2025: Vawiin chawhnu khan Pu Lalnghinglova Hmar, Minister of State, Sports & Youth Services Department chuan Bharat Mandapam, New Delhi-a ‘Rising Northeast Investors Summit, 2025’ ah thu a sawi a, Northeast India, a bikin Mizoram in sports leh entertainment sector-a theihna sang tak a neih thu tarlangin, investor te chu Northeast lam hawi turin a sawm.

Ministry of Development of North Eastern Region (DoNER) buatsaih ‘Rising Northeast Investors Summit 2025’ hi nimin khan Prime Minister Pu Narendra Modi chuan hawngin, a hawnna-ah hian Mizoram Chief Minister Pu Lalduhoma a tel a ni. India ram hmun hrang hrang atanga investor fuankhawm hmaah, sector hrang hranga Northeast India potential te tarlangin sawiho a ni a, vawiin khan khar a ni.

Mizoram Sports Minister Pu Lalnghinglova Hmar chuan vawiina chawhnu-a “Unleashing the Potential of Entertainment and Sports in Northeast” session-ah thu sawiin, Northeast India chu state dangte nen khaikhinin population tlem leh area pawh zau lo tak tak ni mah se, sports leh entertainment-ah India leh rampawn thlenga dengchhuak thei mi engemawzat an lo chhuak tawh tih a tarlang a. “India rama population 3% emaw chauh ni chungin Rio Olympics 2016-a Indian contingent 7% dawn chu Northeast infiammi an ni a. Indian Super League season hnuhnung berah pawh player zat atanga 10% lai chu Mizo an ni. Hei hian sports-a Northeast India theihna a tilang.” a ti.

Sports Minister chuan Mizoram in Olympic 2036 vision a nei tih tarlangin, “India in Olympic 2036 thlen a tum tih kan hriat rualin hma kan la nghal a, nikum June thlaah Olympic 2036 thlir chunga National-level Sports Conclave hmasa ber chu Aizawlah neih a ni. Infrastructure tihchangtlun bakah infiammi talent nei tha zawnchhuah a, India ram tihmingthatu tur chherchhuah kan duh.” tiin investor te chu thawhpuiah a sawm.

LESDE Minister ni bawk Pu Lalnghinglova Hmar Northeast India chu music ngainatna hmun, Nagaland a Hornbill, Arunachal Pradesh a Ziro festival leh state danga festival lian te pawh music kaihhnawih zel a nih thu a sawi a. Investment lian zawk nen Northeast leh Mizoram music te chu khawvel hriata phochhuah tlak a ni a ti.  Northeast chu film siam nan duhthusama hmun mawi a ni tih tarlangin, “Film tha tak pakhat chauh pawhin state tourism a chawikang dawrh thei a. Mizoram leh Northeast lam rawn hawi turin Bollywood film siamtute ka sawm che u a ni.” a ti.

Union Minister for Youth Affairs & Sports Dr. Mansukh Mandaviya pawhin thu sawiin, sports leh entertainment sector te chu inkawp tlat a ni a, heng sector pahnih-a Northeast India hmasawnna’n sawrkar laipui chuan theihtawp a chhuah tih a tarlang a, “Hmarchhak state te pualin ‘Khelo India Northeast Games’ buatsaih tura hma lak mek a ni”. a ti. Hmasawnna lian leh awmze nei tham thlen turin corporate nena thawhdun pawimawhzia a sawi bawk.

Vawiin chawhnu session-ah hian Indian footballer hlui Pu Bhaichung Bhutia bakah Sports Authority of India hotu te, entertainment industry-a expert te’n Northeast a sports leh entertainment sector hmasawnna tur an sawiho bawk a ni.

Pu Lalnghinglova Hmar hian Mizoram stall bakah Mizoram atanga startup kal pali - Lailen Consulting Pvt. Ltd., Indubitably Cultured, Fungki leh Suzanne Delish Delight Pvt. Ltd. te stall a tlawh nghal bawk.

Attachment