PRESS STATEMENT
Vawiin 28th September, 2021 (Thawhlehni) chhun dar 12:00 khan Mizoram Sawrkarin Khelo India Scheme hnuaia Khelmual Phullem phahna tur Lungphumna hun MSSC Complex, Muallungthu-ah hman a ni.
He Lungphum phumna hunah hian Prof. F. Lalnunmawia, MLA, Aizawl South III bialtu leh Pu T.C. Pachhunga, Vice Chairman, Sports, Youth Affairs, ICT & Tourism Board te chu Khuallian niin, Pastor C. Lalrintluanga, Presbyterian Kohhran, Muallungthu in he lungphumna hun hi tawngtaiin Pathian hnenah a hlan.
Mizoram State Sports Council Complex, Muallungthu hmuna Synthetic Football Turf siamna tur atan KHELO INDIA SCHEME, Ministry of Youth Affairs & Sports, Government of India atangin Rs.500.00 lakhs approval dawn a ni a, he hna thawk tur hian Décor India, Guwahati te thlan niin, Work Order pawh pek tawh a ni.
He hunah hian Khuallian Prof. F. Lalnunmawia chuan thu sawiin, "Thalai infiamna lama tui mite tuihalna phuhru tura Chief Minister, Pu Zoramthanga kaihhruaina hnuaia Sports Minister Pu Robert Romawia Royte leh Sports, Youth Affairs, ICT & Tourism Dev. Board hmalakna a hmun hrang hranga infiamna ruhrel tha din chhoh mek a ni hi a ropuiin a lawmawm hle a, a bikin kan bial chhunga Football ground a phullem phah a ni tur hi Bialtu MLA ka nihna angin lawmthu ka sawi a ni" a ti.
Aizawl South III MLA chuan, "Covid-19 hrileng kara sports tih hmasawnna hna thawh hi mithenkhatin an hrethiam lo niin a lang. Vawiina lung kan phum hi Central Sawrkar in 'Khelo India Scheme' sum atanga Sports Infrastructure siamna tur atana a sanction a ni a, thil dang atan hman theih a ni lo, hrileng dona leh hmasawnna hna thawhna tur chu a hrangin a kal a ni. Chutih rualin heng project kan hmuh atang hian Mizoram Sawrkar ah Chhiah-GST leh Labour Cess thahnem tak a lut a ni," a ti a, "Kan Sawrkar hian Covid-19 do chungin a theihna zawnah theihtawpin hna a thawk zel a ni," a ti.
He hunah hian Khuallian Pu T.C. Pachhunga chuan thu sawiin, "Kan CM leh Sports Minister te kaihhruaina in Mizoram hmun hrang hrangah khelmual leh infiamna ruhrel - sports infrastructure engemaw zat siam tawh leh siam mek a ni hi a lawmawm takzet a, abik takin Muallungthu a Football leh Hockey Turf phah a ni thei hi thil lawmawm tak a ni" a ti. "Heng sports infrastructure siamna atana central sum kan hmuh te hian Mizoram finance dinhmun a ti tha sawt zel a, chu chu mipui tan malsawmna thlentu tangkai tak a ni thei a ni. Sports Minister leh Sawrkar hmalaknain Sports Policy tha tak kan nei tawh a, football leh sports discipline hrang hrang hmanga eizawnna hmu mi thahnem tak kan nei tawh a ni" a ti.
Lungphum inkhawmna hun hi Pu H. Lalengmawia, IAS, Commissioner & Secretary, Sports & Youth Services, Govt. of Mizoram chuan a kaihruai a, Technical Reports, Pu James Lalramnghaka, A.E., MSSC hnen atanga ngaihthlak niin, Pu H. Laldinsanga, SPO, MSSC in hun kharna a hmang a ni.
Issued by Mizoram State Sports Council. Aizawl, Mizoram
Attachment
