Aizawl, the 14th December 2021 : Vawiin khan Power Minister leh Tawi bialtu ni bawk Pu R. Lalzirliana'n Keifang Football Field ah phul lem phah chu a hawng a. Sports Minister Pu Robert Romawia Royte leh SEDP hnuaia Sports and Tourism Development Board Vice Chairman Pu TC Pachhunga te pawhin he hun hi an hmanpui a ni.

Pu R. Lalzirliana chuan Keifang kum 100 tlin lawmna leh Keifang field phul lem phah hawn a kalkawp leh Centenary puala Organizing Committee in program phuisui taka an buatsaih chu lawmawm a tih thu a sawi a. Term 5 lai Saitual bial ni thin tuna Tawi bial tia hriatah mipui aiawh tura thlan a ni chu Pathian malsawma a dawn vang leh bial mipui duhsakna a dawn vang a ni tiin helai biala a tir bera ding tura a sualchhuah dante a sawi a. Harsatna tam tak karah Pathian in finna leh remhriatna pein a tanpui zel avangin mipui tan kum 20 chuang a thawk thei tiin a sawi. Pathian chu engkima kan innghahna a ni tiin party hotuteah rinna kan nghat tur a ni a mahse min tanpuitu ber chu Pathian a ni tih hi kan hriat a pawimawh a ni, a ti.

Sawrkar a inthlak a policy tha tak tak leh mipuiten an tangkaipui program te chhunzawn a ni lo thin hi a tha lo a, a pawi a mahse Pu Zoramthanga kaihhruai Sawrkarin Sawrkar hmasa thil tih that tam tak an chhunzawm chu fak an phu tih a sawi a. Keifang field a phul lem phah chu District mipuiten ten dimdawi taka enkawl tura chahin District Sports Complex ang te pawh hi kan la neih ngei ka beisei, a ti.

Sports Minister Pu Robert Romawia Royte pawhin thu sawiin Keifang field ah phul lem phah chu khaw bil emaw veng bil emaw ta a ni lo a, district mipuite tam thei ang berin hmang tangkai se tih hi kan duhdan a ni, a ti a. Zirna kalphung thar National Education Policy 2020 ah naupangte tan infiamna chu tih compulsory a nih thu sawiin school tam zawkin infiamna hmunhma kan nei tha lova, kan neihsa te hi kan intawm a ngai dawn a, chutiang atan chuan kan sports infrastructure neih sa te leh buatsaih mek hi naupang tan an tangkai hle a ni, a ti a. Saitual District chuan infiammi tha tak tak Mizoram ti hming tha a cherchhuah zel a beisei thusawiin District Sports Complex tuna Lunglei, Lawngtlai leh Mamit a buatsaih mek ang chu Saitual pawhin nei tha a tih thu a sawi a. Keifang Field behchhanin Tata Trust Football Academy chu Saitual District tan dah tum a nih thu a sawi lang bawk.

Programme hi Pu H. Lalengmawia, Commissioner & Secretary, Sports & Youth Services in kaihruaiin Pu John Tanpuia, Secretary, Mizoram State Sports Council in phul lem phah chanchin Technical Report a sawi a ni.

Keifang Football Field a phul lem phah hi NEC sum hmanga tih niin cheng nuai 538.81 senga siam niin a contractor chu Lushai Engineers Aizawl an ni a. He project hnuaiah hian Synthetic Turf phul lem phah a nih bakah Pavilion sak, Dressing Room leh inthiarna room leh tui dahkhawlna siam te a tel a ni. Synthetic Football Turf phah chin area hi metre 100 by 75 niin Play Area chu metre 105 by 69 a ni a. Pavilion hi mi 200 vel leng tura buatsaih niin a dung metre 20.4 a ni a, a vang hi metre 9.7 a sak a ni. Pavilion hnuaiah Dressing Room 2 leh inthiarna 6 a awm a. RCC Water Tank tui litre 20000 dah khawl theihna siam a ni bawk. Field enkawl turin Keifang Joint VC chuan Keifang Centenary Sports Complex Development and Management Committee an din a ni.

Tukin zing khan Pu R. Lalzirliana hian Presbyterian English School Keifang ah ICT Department hmalakna hnuaia Zirna ina Computer zirna tihchangtlunna NEC Project 'ICT@School' hnuaia din Laboratory cum Computer Room chu a hawng bawk a ni. He computer zirna atan ICT Department in computer set 7 an pe a ni.


Attachment








Written by: Pratap Chhetri, MIS, Deputy Director