Aizawl, the 17th April, 2025: Mizorama Volleyball inelna lian ber Pro Volleyball League 2025 chu ni 29th April - 24th May, 2025 chhungin LPS Arena, Falkland-ah neih tura ruahman niin, ni 17th April, 2025 hian chumi atana pawimawh tak pakhat Handbook chu MSSC Conference Hall, Hawla Indoor Stadium-ah Release a ni. Handbook hi Tv. Lalsangliana Pautu (Taitea), Youth Icon 2024 chuan a tlangzarh a; Dr. Lalmalsawma Nghaka, President MVA chuan thu a sawi bawk.
Dr. Lalmalsawma Nghaka, President MVA chuan hun hmasa kan thlirin MVA hruaitu lo ni tawh te'n theihtawp an lo chhuahna rah hi tuna MVA hruaitu ni mek leh District, Club, Players leh Volleyball tuimi te'n kan chang hi lawmawm ka ti hle a. COVID hripui lên lai tih loh kha chuan Sports Discipline ṭhangduang ber kan ni ta hi a lawmawm hlein ka hria. Hei aia nasa zawka hmasawn zel hi Mizoram puma kan tum anih piah lamah Mizoram chauh ni lovin International Coach leh International Player neih belh zel hi kan tum a ni a, Pathianin rem a tih chuan tuna kan neih mek National Referee bakah International Referee pawh kan la nei ve zel thei ang, a ti.
Dr. Mala chuan Mizoram Volleyball Association hian kan hruaitute zarah a hun bituk awm chu ni mahse khawtlanga kan thawhpuite zarah Volleyball Indoor sakna tûr ram ṭha tak mai kan nei thei ta hi a lawmawm ka ti hle a. A sak chhunzawmna tûr leh Volleyball chhungkua te'n hma kan sawn zel a, a hlawhtlinna kan hmuh ngei theihna atan ṭawngṭaina lama Pathian âu hnem turin ka sawm che u a. Tin, kan sorkar hotute pawh kan hruaituten theihtawpin an dawr zel ang a, National Standard Size Volleyball Indoor Stadium ṭha tak neih theih ngei kan beisei a ni, a ti bawk.
Tv. Lalsangliana Pautu (Taitea) chuan Volleyball hi ka ngaihlu khawp mai a. Ka Game ngainat leh khelh nasat ber a ni bawk. Position hrang hrangah te lo khel tawhin Volleyball khel tur hian Court hla zawk pawh kein ka pan ve ṭauh ṭauh ṭhin a ni. Volleyball hi ka tui chilh êm avangin TV lamah pawh kan thlir nasa a, mi Wifi pawt ru hialte pawhin National leh International Match te kan lo en ve ṭhin a, tun hnuah khelhna hun nei tam tawh lo mah i la ka Game ngaihthlut ber a la ni reng a ni, a ti.
Taitea (Youth Icon 2024) chuan Mizoram Volleyball-in hma a sawn theihna atan a khelh nuam kan tih piah lama pawimawh ber chu kan hmangaih hi a ṭul hlein ka hria a. A dawt lehah chuan inlungrual a ngai hle bawk a. Hruaitu level a ni emaw, Player Level-ah pawh inlungrual a ṭul hle a, chu chuan nasa takin hma min sawn tir ka beisei tlat a ni. Tin, Pathian malsawm tlaka Volleyball kan khelh a ṭul a, ruihtheihthil nena kan chawhpawlh chuan hma kan sawn thei dawn lova, Pathian ṭih chunga he Game kan vawn tlat chuan a hlawhtlinna hi tun aia nasa hian a pung ang tih ka ring tlat a ni, a ti bawk. International Coach nei thei tura hruaitute hmalakna ṭha ka ti hle a, a tuimi tam zawkte pawh hei aia thuk zawka Volleyball luhchilh zel turin ka sawm che u a ni, a ti bawk.
He hun hi Pu Donald Khawlhring, Vice President MVA chuan kaihruaiin, Pu H. Vanlalngura, Treasurer MVA & Chairman Technical chuan Handbook Report a pe a. Pu R.K. Hmingthanga, Jt. Secretary MVA chuan kalkhawmte hnenah leh MSSC hnenah lawmthu sawiin hun hnuhnung zawk hi Technical Committee, MVA kaihhruaiin Manager's Meeting neih zui nghal a ni bawk.
Attachment
