Aizawl, the 11^th June, 2025: July ni 23 atang ni 27, 2025 chhung a Solo (Surakarta), Indonesia a neih tur, Badminton Asia Junior Championships, 2025-a India aiawh a khel turin H. Lalthazuala S/o H. Zohmangaiha, Chanmari West leh C. Lalramsanga S/o C. Lungmuanpuia, Durtlang te chu an in vaw tling.

Badminton Association of India (BAI) in June ni 8-11, 2025 chhunga Final Selection Trial, New Delhi-a a buatsaihah Mizoram player pathum- Thazuala, Ramsanga leh Lalrempuii, Serchhip te chu koh an ni a. Thazuala hi Boy's Singles category-ah inlan in, Ramsanga leh Rempuii te hi Mixed Doubles category-ah an inlan thung a ni. 

THAZUALA A ROPUI

Badminton Asia Junior Championships 2025-a India aiawh thei tur Final Selection Trial hmachhawn tur hian Boy's singles category huangah India top player 11 koh an ni a. Stage 1-na ah group A leh B-ah then an niin, Thazuala hi group A-ah player dang 5 te nen a awm a, an inkhel kual. He group a a awmpui, India No. 2, Gnana Dattu TT te, India No. 5 Suryaksh Rawat te, India No. 7 Sarvesh Mahesh Yadav bakah Badminton World Federation (BWF) Ranking a No. 10 ni phak, Sai Prasad Teegala leh No. 13, Abishek Kanapala te chu a hneh vek a ni.

Group A leh B-a a sang 2 ten Stage 2 an khel leh a, hetah hian player pali te hi an inkhel kual vek thung. Thazuala hian India No. 4 leh Men's singles-a India No. 6 ni mek, Rounak Chouhan chu straight set in a hneh phawt a, chumi hnu ah ranking No. 3, Pranauv Ram N nen intum leh in, deciding game-ah a chak. A match tawp berah group stage-a a lo hneh tawh, Suryaksh Rawat nen intum nawn leh in, straight set bawk in a chak leh a, a tumpui zawng zawngte hneh vekin, India aiawh turin a in vaw tling ta a ni.

RAMSANGA A SANG ZEL

Mixed Doubles Category huangah Final Selection Trial hmachhawn turin India Junior player tha leh ranking nei sang pair 6 koh an ni a. Hetah hian Ramsanga hi Taarini Suri nen an inkawp. An match hmasa ber ah top seed, Vansh Dev leh Shravani Walekar te an hneh a, match hnihna ah Mithilesh PK leh Reshika U te tangdun an hneh leh bawk. Anni bakah Bjorn Jaison leh Vishakha Toppo te inkawp leh Showrya Kiran J leh Lalrempuii te tangdun an hneh leh a, chak loh nei lo in Final Selection Trial hi an paltlang a, India ai an awh dawn a ni.

Tin, Rempuii pawh hian Girl's Doubles leh Mixed Doubles huangah inelna hi hmachhawn thei dinhmun ah a ding a. Girl's Doubles-a a partner hlun kian in, hemi category bikah hian a inlan ta lo. Mixed Doubles Category-ah erawh an aia chak hnem zawk an awm avangin an tlang thei ta lo hlauh a ni.

MBA LAWMTHU SAWINA

Mizoram Badminton Association chuan heng player te hi a chhuang tak zet zet a, Mizoram mai piah lamah India ram ti hmingthatu ni zel turin duhsakna sang ber a hlan a ni.

Mizoram Badminton in tun dinhmun a thlen theih nana kan thawhpui- TATA Trusts, Pullela Gopichand Badminton Academy (PGBA), NEIDA, Mizoram State Sports Council (MSSC) te leh Sports and Youth Services Department te chungah lawmthu a sawi tak zet a. Tin, Mizoram a badminton game in hma a sawn zel theihnana Mizoram Badminton Centre, Zuangtui enkawl tirtu, Aizawl Smart City Limited te chungah pawh lawmthu a sawi bawk a ni.

Attachment