Dated Saitual the 29^th January, 2024 : Vawiin Chawhma khan District Sports Committee chu Chairman Dr Lalngura Tlau, DC hovin Saitual DC Conference Room ah an thukhawm.

District Sports Committee Chairman, Dr Lalngura Tlau, Saitual Bawrhsap ni bawk chuan Mizoram State Sports Council atanga fund hmuh ang ang te tangkai taka hmanga, theih tawp chhuah zui turin a fuih a,hma la tha te leh hlawhtlinna nei te chu sawrkar atanga fund awm thei ang ang inpuihna kawngah pawh theihtawp chhuahpui a nih tur thu a sawi bawk.

Chairman chuan Saitual District chu Sport lamah theihna nei tak tak te an awm thu sawiin, ruahmanna tha leh awmze nei taka chher chhoh an nih chuan Mizoram mai nilo, India leh Khawvel huap pawh a pho chhuah theih tur an la awm a beisei thu a sawi a, chumi ti hlawhtling tur chuan vawiin a kalkhawmte chu an pawimawh takzet thu a sawi.

Saitual District Sport Committee hnuaiah hian sport Association hrang hrang 19 awm mekin hmasawnna awm tawh dan hrang hrang leh tun dinhmuna district sports leh a kaihhnawihte thlirho a ni a,tun aia infiamna kawng hrang hranga hmasawn theih dan tur kawngte ngaihtuah a ni. Mizoram State Sports Council atanga an pawisa dawn te tangkai taka hman anih theih nan ruahmanna siam a ni bawk.

Vawiin a Meeting ah hian District Sports Committee leh Sports Association hrang hrang te bakah Department aiawh Ex-officio te an kal tha hle.

Attachment

Written by: David A Lalhmingchhuana, MIS, DIPRO - SAITUAL