Saitual, the 28^th May, 2025: Vawiin khan DC Conference Room, Saitualah, District Sports Committee chu an chairman, District Bawrhsap ni bawk, Dr. Lalngura Tlau kaihhruainain an thukhawm.

He hunah hian District Bawrhsap Dr. Lalngura Tlau chuan Saitual District chhunga Sports Association hrang hrang hruaitute inpekna leh thawhrimna chu fakawm a tih thu a sawi a, infiammi te zingah Saitual District tihmingthatu an awm thin chu lawmawm a tih thu a sawi bawk. Bawrhsap chuan District Sports Committee chu infiammi chawimawi phu te leh tanpui mamawh te tan a inhawng reng a ni, a ti a, chutih rualin Association anga an mamawh thlen te chu inkaihhruaina dan awm sa anga inpek a tul a ni, a ti.

DSC Chairman Dr. Lalngura Tlau chuan Saitual District Sports Association hotute chu naupang infiamna kawnga talent nei tha te hai chhuak a, infiammi tha tak ni tura chher chhuak thei tura tan leh lehzual turin a chah nghal a ni.

Vawiin thutkhawmah hian Saitual District- Boxing Association, Wrestling Association leh Athletic Association atanga dilna lo lut te ngaihtuahho a ni a, Committee chuan tul leh tha a tih angin an dilna te hi tihhlawhtlinsak a rel a ni.

Vawiin thutkhawm hi Dr. Lalngura Tlau, District Bawrhsap leh District Sports Committee chairman ni bawk in a kai hruai a, Saitual District Sports Committee - Office bearers, members te leh ex-officio members te an tel a ni.

Attachment

Written by: F Zodingpuii, MIS, DIPRO - SAITUAL