Saitual, the 26th May, 2025: Vawiin chawhnu khan Minister of State, Tawi Bialtu MLA ni bawk, Prof. Lalnilawma chu MLA Cup Season Ending Volleyball Tournament 2025 kharnaah khuallian niin hun a hmanpui a, District Bawrhsap Dr. Lalngura Tlau leh Pu Gaurav Tyagi, SP ten an tawiawm a ni.
He hunah hian Minister Prof. Lalnilawma chuan kalkhawmte hnenah lawmthu sawiin, MLA Cup Season Ending Volleyball Tournament 2025 kharna hun tluang taka an hmang thei chu lawmawm a tih thu a sawi a. Saitual District-ah volleyball chawi lar a nih zel theih nan leh Saitualin Inter District Volleyball tournament a thlen theih nan theih tawp a chhuah zel tur thu Minister hian a sawi. Infiammi te tan Saitual Distrct-a taksa sawizawina (gym) te pawh tih changtlun mek a ni, a ti.
Prof. Lalnilawma chuan Mizoramah infiamna chu uar lehzual a tul tih a sawi a, Olympic Games-a Mizo thalaite a tam thei ang ber an tel theih nan Sawrkar pawhin theih tawp chhuah a tum a ni, a ti. Minister chuan infiammi te chu ruihhlo laka fihlim a pawimawh tih a sawi a, chumi tur chuan tan la zel turin inkhel tur te chu a fuih nghal a ni.
Minister chuan final hlimawm leh inelna thianghlim tak nei turin volleyball players te chu a sawm a, duhsakna sang ber a hlan nghal a ni. Vawiinah vek hian Minister chuan a bial chhunga development works thawh mek thenkhatte chu a hmunah a tlawh nghal a ni.
MLA Cup Season Ending Volleyball Tournament 2025 hi Saitual District Volleyball Association huaihawt niin, a kharna inkhawm hi Pu HVL Hruaizela, President, SADVA-in a kai hruai a, technical report hi Pu PC Lallawmkima, Technical Secretary atanga ngaihthlak a ni. Tv. Lalruattluanga, General Secy, SADVA chuan inhmelhriattirna neiin, thusawi hi khuallian Minister Prof. Lalnilawmna leh Pu C. Lalbuatsaiha, Vice President, SADVA hnen atanga ngaihthlak a ni.
MLA Cup Season Ending Volleyball Tournament 2025 hmeichhe category result chu Daido Volleyball Club 3 - 0 F&B (Fabian & Brandon) Volleyball Club niin Daido Volleyball Club an chak a, Mipa category result chu Rulchawm Volleyball Club 3 - 0 VH. Ropianga Memorial Volleyball Club niin Rulchawm Volleyball club te an chak a ni.
Attachment
Written by: F Zodingpuii, MIS, DIPRO - SAITUAL
