Dated Serchhip, the 20^th May, 2025: Vawiin khan Serchhip District Sports Committee chu an Chairman Pu Paul L. Khuma, Serchhip DC hoin Serchhip DC Meeting Hall ah an thukhawm. 

Meeting-ah hian Serchhip District Sports Committee hnuaia Sports Association hrang hrang ten promotional fund an dilna ngaihtuah a ni a. SDSC Office Bearers te leh Association hruaituten uluk zawka sawi hoin an dilna te zir chiang se, an zirchianna leh hmuh dan te an thlen hnuah SDSC-in inkaihhruaina dan a neih angin promotional fund te hi pekchhuah ni se, tiin an rel. SDSC inkaihhruaina dan ennawn chungchang meeting-ah hian sawilan niin hei pawh hi OB te lo enzui tura dah niin draft mumal taka siam hnuah States Sports Council pawmpui tura thawnthlak ni se, tiin an rel a ni.  

Serchhip Sports Complex ram land lease siam chungchang theih tawpa bawhzui chhunzawm zel a ni a, a ram thenawmte hnen atangin NOC lak kim a ni tawh a. Revenue Surveyor hoa teh fel tawh niin Revenue lama thuneituten a en fel hna an thawk tawh bawk tih meeting ah hian tarlan a ni a. Land Committee in a la enzui leh tur thu meeting-ah hian ngaihthlak a ni. Mizoram State Sports Council chuan NESIDS kaltlanga Complex Field sirah Multipurpose Hall sak tuma ruahmanna an siam mek thu leh DPR buaipui mek a nih thu report a ni bawk. 

Vawiin meeting-ah hian SDSC hnuaia recognised Association hrang hrang te chetvelna leh an hmalakna te tarlan a ni a. Sports Complex Field hman dan chungchang pawh sawi niin football khelh nan chauh ni lo, Serchhip District hmel lanna sawrkar leh khawtlang thil pawimawhah a tul anga hman chhunzawm zel ni se, a hmang tuten uluk leh duat takin enkawl thin ni se, tiin an rel bawk a ni.

Attachment

Written by: Lalnunmawii, MIS, Deputy Director