Dated the 4^th April, 2025 : Mizoram Sports & Youth Services Minister Pu Lalnghinglova Hmar chu South Asian Football Federation inkhawmpui, SAFF Extraordinary Congress vawiina (April 4)  Sri Lanka khawpui Colombo-a Shangrila Hotel-a neihah India aiawhin a tel. 

Pu Lalnghinglova Hmar hi All India Football Federation (AIFF) Executive Committee Member a nih bakah Asian Football Confederation hnuaiah Social Responsibility Committee-ah member a ni mek. 

He inkhawmpuiah hian Asia Chhim-Chhak ram pasarih - Bangladesh, Bhutan, India, Maldives, Nepal, Pakistan leh Sri Lanka aiawh palaite an tel a, Mizoram Football Association President ni bawk Pu Lalnghinglova Hmar hian India ai a awh a ni.

He inkhawmpui hi Asian Football Confederation President Shaikh Salman bin Ebrahim Al Khalifa chuan hmanpuiin thu a sawi a, SAFF member-te inpumkhatna leh thawhona țha a tih thu sawiin duhsakna a hlan.

SAFF inkhawmpui hian an pawl danpui țhenkhat an tihdanglam bakah SAFF hnuaia inelna kalpui dan turte an rel a ni. 

Inkhawmpui zawh hnu hian Sports Minister leh AFC President hi a hranpaa inkawmin India ram, a bikin hmar chhakin football lama hma a sawn theihna tura rawtna a neihte Pu Lalnghinglova Hmar hian a hrilh a; Indian football hre chiang turin India a tlawh leh hunah football tuichilhna hmar chhak state tlawh tel turin a sawm. Tourism Minister ni bawk Pu Lalnghinglova Hmar hian AFC President hnenah Mizoram chu ram mawi leh nuam, India ram hmun dang a tlawh tawhte nena inang lo tak a nih avangin a hmuna tlawh turin a sawm nghal a ni.

Attachment