Dated Aizawl, the 10th June, 2026 : Sport and Youth Services (SYS) Minister Pu Lalnghinglova Hmar chuan vawiin khan a Pisa-ah ONE Championship Winner leh contract hlawh chhuaktu Nazareth Lalthazuala lawmpuina hun a hmang.
Pu Lalnghinglova Hmar chuan Nazareth Lalthazuala chu a lawmpui takzet thu sawiin, a hlawhtlinna chuan mawhphurna lian tak a kentel thu leh Mizo naupangte fuihtu leh ti phurtu tur a nih thu a sawi a. Tunah chuan ‘professional’ a nih tawh avangin a kutah mawhphurhna leh chona lian zawk hmachhawn tur a awm tih sawiin, world champion ni thei turin tun aia nasa zawka tan la turin a fuih a ni.
Minister chuan Empowering Mizoram Youth chungchang pawh sawiin, kum 2036 Olympic Games-a Mizote kan tel ve ngei theih nan infiamna thlan bik pariatah insawrbinga hmalakna kalpui mek a ni, a ti. Combat sports zawng zawngte training-na tur hmunhma tha bik, ‘Boxing Centre of Excellence’ din turin NESIDS-OTRI (North East Special Infrastructure Development Scheme - Other than Roads Infrastructure), Ministry of DoNER hnuaiah Rs. 38,39,94,251.47 senga hmalak mek a nih thu a sawi bawk.
Thusawitu dang Pu Jeje Lalpekhlua, MLA chuan Nazareth Lalthazuala chu nakin zel atan a chetsual loh nan agent thlan chungchangah fimkhur tur leh mahni hmakhua ngai tak chunga ngaihtuahna fim tak seng turin a fuih a. Mizote tihmingthatu nih a tum zel chuan a kal sual ngai dawn loh thu a sawi bawk.
SYS Director Pu H. Lalhmingthanga chuan SYS-in infiammite tan theihtawp a chhuah thin thu sawiin, an hlawhtlin leh hlawhtlin loh chu infiammite kutah thui tak a innghah thu a sawi a. Nazareth Lalthazuala chu khawvel huapa Mizote hming titha zel turin duhsakna a hlan a ni.
Nazareth Lalthazuala chuan Minister nen an inbiak pawh reng thu leh amah a ngaihtuah thinna zawng zawngah lawmthu a sawi a. Mizoram State Mixed Martial Arts Association (MISMA) hnenah pawh lawmthu sawiin, MISMA chu Sawrkar recognise turin a ngen a ni.
He hunah hian MISMA aiawhin Pu Samuel Lalrozama, MISMA Secretary pawhin thu a sawi bawk.
Nazareth Lalthazuala hi Phuaibuang khaw chhuak niin tunah hian Zemabawk East-ah a cheng mek a, a professional record-ah vawi riat chak tawhin vawi khat mah a la tlawm lo a ni. ONE Championship-a a sulhnu chu hetiang a ni:
1) ONE Friday Fights 157 (June 5) ah Philippines fighter Jhon Brutus a hneh.
2) ONE Friday Fights 144 (February 27) ah Philippines fighter Jake Bron a hneh.
3) ONE Friday Fights 135 (November 28) ah Japanese fighter Masaki Suzuki a hneh (December ni 5, 2026 ah Sports Minister-in lawmpuina hun a hmang a ni).
A record dangte:
1) Bronze medal (Wushu), National Games 2025
2) National MMA champion vawi 3
3) MISMA Mizoram State MMA Champion vawi 3
4) Mizoram Fight League Flyweight Champion
A lawmpuina programme-ah hian Adviser to CM Pu Lalmuanpuia Punte, MLA; MISMA Honorary President Lt. Col. Clement Lalhmingthanga, MLA; Pu Jeje Lalpekhlua, MLA; Pu V. Lalsangliana, Commissioner & Secretary, Sports and Youth Services Department, official pawimawh dangte leh MISMA hruaitute an tel a ni.
Attachment
