Mizoram State Sports Council, Government of Mizoram, India

Dated Aizawl, the 20^th May, 2026 : Nimin khan Sport Minister Pu Lalnghinglova Hmar chuan Yonex-Sunrise PC Gabriel Lalliansanga Memorial MBA Junior Official Badminton Championship, 2026 hawnna inkhawm Ramhlun Indoor Stadium-a neih chu khuallian niin a hmanpui. Pu PC Lallawmsanga, IPS DGP (Rtd.) chu khualzahawm a ni.

Khuallian chuan thusawiin, Mizoram sawrkarin ruihhlo do kawnga nasa taka hma a lak mek laiin, kalkawm zingah ruihhloin a tihbuailoh thalai tam tak a hmu chu lawmawm a tih thu a sawi. Mizoramin sports-ah nasa taka hmasawnin, Badminton chu sport discipline hmasawnna hmu nasa tak a nih thu a sawi a. Mizoramin hun reilote chhungin junior leh Sub-junior-ahte champion leh potential champion tam tak an lo chhuak chu a lawm thu sawiin, inzirtirna tha/dik (right training) nena hmalak a nih chuan, badminton chuan tun dinhmun aia sang zawk a thleng anga, infiammi tha tak tak an lo chhuah belh zel a rin thu a sawi. Minister chuan sawrkarin Olympic 2036 hmathlir neiin a bulthut atangin sports a kalpui tih a sawi a, Mizote thiam zawng, India-ah pawh a thatna Olympic sports discipline thlanchhuah pariat - Archery, Badminton, Boxing, Hockey, Judo, Taekwondo, Weightlifting leh Wrestling - ahte mithiam (Exellence) zawnchhuah leh chherchhuah an tum tih a sawi a , Infiammite chu Olympic Games khel pha thei tura tan la tura fuihin , Olympic vision nei turin a chah a ni. Sports infiamna hian taksa, rilru leh ngaihtuahna thlengin hriselna a thlen a, hei vang hian mihringte hriselna atan hian infiamna hi damdawi tha a nih thu a sawi bawk.

Khualzahawm Pu PC Lallawmsanga pawhin thu sawiin, kalkhawmte chu infiamna uar turin a chah a, infiamna hian mahni invawnna (discipline) a ken tel avangin, zirna lamah te pawh min pui theih thu a sawi. Hlawhtlinna chang tur chuan bul tan hma a pawimawhzia hria a, Mizoram sawrkarin grassroot level atanga infiammite tih hmasawnna kawng a ngaihtuah chu lawmawm a tih thu sawi bawk. Exise & Narcotics Dept. aiawhin Pu Peter Zohmingthangqa chuan thu sawiin, kakhawmte chu ruihhlo laka fimkhur zel tur leh tichhin ve lo turin a chah a, invawng taka nung a, India leh khawvel-ahte Mizoram tihmingthatu ni thei turin a fuih bawk. Pu Peter-a kaihhruaiin kalkhawmte hian ruihhlo ti velo tura intiamna an nei bawk a ni.

MBA hruaitute atangin report ngaihthlak a ni a. Pu Laltanpuia, Treasurer, MBA chuan lawmthu sawinain inkhawm hi a khar a ni.

Attachment