Dated Aizawl the 28^th June 2023: Vawiin khan Sports and Youth Affairs Minister Pu Robert Romawia Royte chuan Mizoram Table Tennis Association Season Opening Championship 2023 MTT Hall, Kawltheihuan, Mission Veng-a neih chu a hmanpui.

He championship hawnna inkhawmah hian Sports Minister Pu Robert Romawia Royte chuan thu sawiin Mizoram Table Tennis Association in Season Opening Championship an nei leh thei chu a lawmpui hle a ni, a ti a, TT players kalkhawmte hnenah chuan an hruaitute chu Mizoram a infiamna pawl hrang hrang inzawmkhawm leh Mizoram Olympic Association-ah pawh hruaitu pawimawh tak tak te annih avangin an vannei hle a ni, a ti bawk.

Minister chuan TT players-te chu nungchang mawi leh ruihtheihthil laka an fihlim tih a hriat avanga a lawm thu a sawi a, theihtawp a tumruhna nen a sang tak thleng chho turin duhsakna a hlan bawk. Infiamna a hlawhtling leh hlawhtling lo inkar chu thiamna inang theuh pawh nimahse rilru a ni, a ti a; rilru khauh tak leh tumruhna neih a pawimawh takzet a ni, a ti. Fitness pawimawh zia sawiin ,Fitness neih nan insawizawi mai bakah ei leh in a pawimawh em em a, thil hrisel tak ei a pawimawh a ni, a ti.

He Season Opening Table Tennis Championship hi ni 3 chhung neih tur a ni a, Category 16 ah Infiamna hi neih a ni ang. District hrang hrang atangin Club leh Association 21 an tel dawn a, tum danga tel ngailo Men's Double leh Mix Double telh thar a ni bawk.

Vawiin Program-ah hian Mizoram Ranking and Seeding, Transfer Rules chu Minister hian a tlangzarh nghal a, he Rules in a tarlan dan hian Season hman zawh chiah ranking chu Season Opening Tournament ah seeding siam nan hman a ni ang. Mizoram a ranking lawmman hlanna neih nghal niin Mipa ranking ah No.1 chu Jeho Himnakulhpuingheta, Techmaze club a ni a, hmeichhia Ranking pakhatna pawh Techmaze club atang thovin Lalthansangi Sailo a ni.

Mizoram Table Tennis Association hian Mizoram hmun hrang hrangah Association neiin national level-ah pawh lawmman thahnem tak an dawng nual tawh a. Tuna Mizoram No. 1 ni lai mek Jehu Himnakulhpuingheta chu July 28-Sept 8, 2023 chhunga World University Games,Chengdu China a neih turah India University team zinga tel tura thlan a ni bawk.

2023 MTTA Season Opening Championship hawnna hi Pu C Lalrinzuala, President,MTTA in a kaihruai a,Dr F Chanchinmawia, Asst Secretary,MTTA in Technical Report pein MTTA hmalakna hrang hrang te a tarlang.

Vawiin Program hi Sports Minister bakah Table Tennis Association hruaitu leh Mizoram hmun hrang hrang atangin infiammite an kalkhawm a ni.

Attachment

Written by: David A Lalhmingchhuana, MIS, IPRO