Dated Aizawl the 17th May,2023: Vawiin khan Sports and Youth Services Minister Pu Robert Romawia Royte Office Chamber ah Jeremy Lalrinnunga hnena LSC hlanna Programme tawi buatsaih a ni a, a nu leh pa ten Jeremy Lalrinnunga aiawh hian LSC hi an dawng a ni.
He LSC hlanna inkhawmtawi buatsaih ah hian Sports and Youth Services Minister Pu Robert Romawia Royte chuan thusawiin Jeremy Lalrinnunga hnena LSC hlan tur hi thutlukna awm tawh, bawhzui ngai awm nual a ni a, amaherawhchu Sports leh Revenue Department te leh sawrkar hotute hmalakna avanga hlan theih in a awm ta chu a lawmawm hle a ni, a ti. Minister chuan dan panhngai in Sawrkar tan hian mimal hnen a ram pek hi thil harsa tak mai ni mahse Council of Ministers hial thukhawm a, lungrual taka Jeremy Lalrinnunga hi inhmun pek a ni, a ti. Hemi rual hian Ainawn veng Local Council in Jeremy-a tana an tanlakna te chu a fakawm in a fin thlak a ti a, an veng pa an hmangaihna leh an chawimawi thiam dan chu a ropui takzet a ni, a ti a. Ainawn veng Bialtu MLA Pu Zothantluanga leh Counsellor te tan lakna pawh a chhuanawm hle a ni, a ti bawk.
Minister chuan infiammi te tan Mizoram ah hmasawnna a awm chho zel a, tunah phei chuan Olympic leh khawvel huap a medal an la anih pawh in lawmman pek dan tur sawrkar in felfai takin dan a duang tawh a ni, a ti. Jeremy Lalrinnunga chu Olympic thleng a lawmman dawng turin duhsakna a hlan bawk.
Dr. Lalrozama Secretary, Sports and Youth Services pawhin thusawiin, Jeremy a chu a naupan laia Boxing a lut tur a ngaih, a talent haichhuah a ni chu a lawmawm takzet a ni, a ti a, hei hian Talent hunt pawimawh zia leh mi, a kalkawng tur zirtir avanga hlawhtlinna a awm theih dan a ti chiang hle a ni, a ti.
He LSC, Jeremy aiawh a dawngtu, a pa Pu Lalneihtluanga pawh in Jeremy-a nen tun hnaia an inbiak thu leh Jeremy an a medal dawn chu a bul tanna chauh a ni, tih a lo hrilh thu a sawi a, LSC pek an nih avanga sawrkar leh Sports Minister chunga an chhungkua an lawmzia a sawi bawk.
He LSC hlanna inkhawm ah hian Sports Minister bakah Jeremy Lalrinnunga nu leh pa te, Sports and Youth Services Secretary, Sports Director, Revenue Director, Mizoram State Sports Council Secretary leh hruaitute, Ainawn veng Local Council aiawhte leh sawmbik mi pawimawhte an tel a ni.
Attachment
Written by: David A Lalhmingchhuana, MIS, IPRO
