Dated Kolasib, the 5^th July 2024: Vawiin khan MSSC Kawnpui Football Ground phullem phah thar chu Pu Lalnghinglova Hmar, Sports &Youth Services Minister chuan a hawng a. Hawnna inkhawm hi MSSC Kawnpui Football Ground ah neih niin, Pu Lalramsanga Sailo,IRS, Sports and Youth Services Secretary chuan Chairman niin a kaihruai a, Rev Zosangliana Fanai in hunserh a hman zawh in Plaque hawnna Khuallian in a nei zui nghal a ni.

Khuallian Pu Lalnghinglova Hmar, Sports and Youth Services Minister chuan an ground hawn tak chu an hman tangkai loh a hlauh thu a sawi a, ground chu sum tuakna a nilo a, Football Development atana hman tur a ni, a ti. Hmeichhe Football a ngaih pawimawh thu pawh sawiin, Kawnpui chu hmeichhe footballer tha chhuahna khua ni tura tan la turin a chah bawk. Mizoten Sports kan hmuh dan pawh sawiin, Sports chu ruihhlo do na hmanrua maia ngaih thinna chu paih a, eizawnna a ni ti a an rilru sukthlek an thlak a ngai tawh a ni, a ti. Hockey pawimawna pawh tarlangin, hockey chu uar thar turin a chah a, olympic khelh theih na kawng awlsam ber pawl a ni, a ti bawk.

Pu Lalnghinglova Hmar chuan Mizoram level ah pawh an ground chu camp nan te pawh an la hman duh tur thu te sawiin uluk taka enkawl turin a chah a, amaherawhchu an chhehvel khua te lakah ground hman chungchang a thilphal turin a ngen bawk a ni.

Pu K Laldawngliana, MLA, 4-Tuirial AC pawhin thu sawiin, Sawrkar hmasa atanga hun rei tawh tak an project chu tih puitlin a nih theih nan Astro turf Demand Committee te dinin hma an lo lak tawh thu a sawi a. Sawrkar laiin sawrkar hmasa a hna an lo thawh tawh na a kaltlangpui chu a lawmawm hle a ni, a ti. Phullem phah hawnna a kalkhawmte hnenah chuan neitu rilru pu theuh a uluk taka enkawl turin a chah bawk. 

Pu Jeje Lalpekhlua, MLA, hawnna inkhawm a Minister tawiawm tu pawh in thu sawiin, football ground tha tak an nei chu a lawmawm takzet a ni, a ti a. An field neih thar chu duat leh uluk taka enkawl a, a hmanna tur diktaka hmang turin a chah a. Grassroot naupang kalkhawmte chu Sports chu tihtakzet a bei turin leh inthlahdah lo a thawhrimna leh insumtheihna te neia Coach te thurawn tha taka zawm turin a chah.

MSSC Kawnpui football ground hawnna a Chairman Pu Ramsanga Sailo, IRS, Secretary, Sports & Youth Services chuan an Department in Kawnpui ah Hockey Academy tha tak an neih thu a sawi a, Kawnpui leh a chhehvel ah Mizoram sawrkar chuan mizote Olympic thleng a an thlen chhoh theih nan chak takin hma a la mek a ni, a ti.

Pu John Tanpuia, MCS, Secretary, Mizoram State Sports Council in Technical Report pe in Ground siam hna chu January ni 12, 2023 khan thawh tan niin, June ni 13, 2024 ah zawh fel a nih thu a sawi.

A project hming hi Laying of Articficial turf at MSSC Kawnpui Football Ground tih niin SASCI Scheme atanga a siamna tur pawisa hi cheng nuai 600 hmuh a ni a, tender chhuah a nih hnuah M/S Decor India, GS Road Guwahati chu thlan a ni.

Football turf phah chin area hi 105X64 metre niin play area hi 100X60 metre a ni a. Pavillion pawh 18.0 X 4.5 metre a zau a chhawng hnih a sak a ni bawk.

A project hnuaiah hian hna hrang hrang thawh tel niin Site Development Work - RCC Structure Slab Extension leh Retaining wall hmanga a field dung lam metre 9 a tih zau a ni a. PVC Coated Chain link Fencing tha taka siam niin gallery metre 16 a thui hmun hnih ah siam a ni a, Field atanga tui paih chhuahna tur leh Field a tui lut tur ven nan drain tha tak siam a ni bawk.

Chief Guest leh mi pawimawh dang ten thusawina an neih hnu in Zotlang Cultural Club, Kawnpui in hnam lam an entir a, hnam lam entir zawh hian Pu C. Lalremsanga, Joint Director, Sports & Youth Services Department in Vote of thanks sawiin hun tihtawp a ni.

Sports Minister hi Deputy Speaker Pu Lalfamkima leh Pu K. Laldawngliana, MLA , Pu Jeje Lalpekhlua, MLA leh Sports Department hotute, MFA hruaitute, khawtlang leh tlawmngaipawl hruaitute leh mi pawimawh dang ten an tawiawm a ni.

Attachment