New Delhi, the 18th of November, 2024: Vawiin chawhnu khan Pu Lalnghinglova Hmar, Minister of State, Sports & Youth Services leh Labour, Employment, Skill Development & Entrepreneurship chuan Dr. Mansukh Mandaviya, Union Minister, Ministry of Youth Affairs & Sports leh Ministry of Labour & Employment chu New Delhi-a Union Minister office-ah a hmu a, Mizoram mamawh hrang hrang a thlen.
Mizoram Sports Minister Pu Lalnghinglova Hmar chuan, India ramin Olympic Games 2036 thlen a tum chungchangah Mizoram atanga infiammite an tel ve ngei a duh thu a sawi a. Hemi inbuatsaihna atan hian Mizoram Sports Conclave pawh June 13-14, 2024 khan hlawhtling takin buatsaih a ni tawh a. Sawrkar flagship scheme ‘Bana Kaih (Handholding)’ hnuaiah Mizorama sports coaching lian tham bultanna tur ruahman a nih thu a sawi bawk.
Pu Lalnghinglova Hmar chuan sawi chhunzawmin Mizoram chu State lian lo tak a ni a, sports budget pawh duh angin a tam thei lo a, sports-a Mizoram hmachhawpte hlawhtlinna’n Sawrkar laipui puihna a mamawh thu a sawi a. Sawrkar thachakna belhchhah turin Corporate leh PSU hrang hrangte pawh dawr kual mek a nih thu Union Minister chu a hrilh bawk a ni.
Union Sports Minister Dr. Mansukh Mandaviya chuan Mizoram Sports Minister hmathlir leh, Mizoram Sawrkarin hma a lo lak tawhna te chu fakawm a tih thu a sawi a. Pawisa dil tur ringawt ni lo, vision mumal tak nei chunga mamawh a thlen thin chu lawmawm a tih thu Mizoram Sports Minister a lo hrilh a, sports infrastructure leh thildang a tulna apiangah a puih tur thu a sawi bawk a ni.
He hunah hian Union Minister chuan state hrang hranga Sports Minister te leh PSU te joint meeting neihpui a tum hnai tih a sawi a. State-a sports department leh PSU te awmze nei zawka thawhho theih dan tur, one State-one PSU model buaipui mek a nih thu a lo hrilh bawk a ni.
LESDE Minister Pu Lalnghinglova Hmar chuan Pi Sumita Dawra, Secretary to Government of India, Ministry of Labour & Employment pawh kawm nghalin Mizoram mamawh hrang hrang an sawidun nghal a ni.
Pu Lalnghinglova Hmar hi Pu John Tanpuia, Director, LESDE & Joint Secretary, S&YS Department leh Pu H. Lalramenga, PS te’n an tawiawm a ni.
