Saitual, the 22^nd April, 2025: Nimin tlai khan Sports Minister Pu Lalnghinglova Hmar hoin Saitual District Wrestling Association chu DC Conference room, Saitualah an thu khawm a, District Sports Committee chairman, Saitual bawrhsap ni bawk Dr. Lalngura Tlau chuan thutkhawmna hi a kai hruai.

He hunah hian Sports Minister Pu Lalnghinglova Hmar chuan Saitual chu wrestling lamah an hmingtha hle tih a sawi a, chutih rualin midangte el pha tur chuan hma sawn zel tumin, ei leh in bakah training kawnga tan lak zel a tul a ni, a ti.

Minister chuan Saitual District Wrestling Association tena an mamawh an thlen te chu a ngaihthlaksak a, Inchai (wrestling) na tur mat ngaihtuahsak a tum thu sawiin, hei bakah hian wrestling lama tui mite tan zirtirna (coaching) mumal tak ngaihtuahsak a tum thu a sawi bawk. Minister chuan Empowering Mizoram Sport (EMS) programme hnuaiah kum 8 atanga kum 18 inkar, infiamna lama talent nei tha tak tak te chu coaching pek thin an ni tih a sawi a, Saitual District-a wrestling lama talent nei tha te tan he programme hmang hian zirtirna pek an nih theih tur thu a sawi bawk.

Pu Lalnginglova Hmar chuan infiammi tha nei tur chuan taksa insawizawina leh tih chakna hmun ‘gym’ changtlung tak neih a pawimawh tih a sawi a, Saitual gym enkawltute pawh an mamawh te ziaka thlen turin a chah a, theih tawp chhuahpui a inhuam thu a sawi bawk a ni.

He thutkhawmah hian Sports Minister Pu Lalnghinglova Hmar,  Dr. Lalngura Tlau, District Sports Committee chairman, Pi Christina Lalnunfeli, District Sports & Youth Officer bakah District Wrestling Association hotute leh District Sports Committee member te an tel a ni.

Attachment

Written by: F Zodingpuii, MIS, DIPRO - SAITUAL