Aizawl, the 19th February, 2025: Sports minister Lalnghinglova Hmar hoin 38th National Games zawh taka Mizoram dinhmun thlirletna leh, hmalak zel dan tur sawi hona neih a ni. He hun hi Lalramsanga Sailo IRS, Secretary, Sports & Youth Services (S&YS) Department chuan a kaihruai a ni.
Aijal Club-a hun hmanah Sports Minister Lalnghinglova Hmar chuan, 38th National Games-a medal late leh Mizoram aiawha kal zawng zawngte a lawmpui thu a sawi a. Mizote hi sports ngaina tak kan nih rualin state dang nena intihsiak nikhuaah kan result a tha tawk lo thin a, engtinnge hma kan sawn ang tih ngaihtuaha sawiho a ngai a ni, a ti.
Sports Minister chuan, "Kan thiamna leh theihna chu medal hmang zela tehin kan awm dawn a, National Games hmangin kan hmaah darthlalang a inhung. Kan kal dan ngai renga kan kal chuan kan result pawh a ngai reng dawn. Kan dinhmun a hniam tih inpawm chungin siamthat ngai lai siamtha ngam ang u," tiin kalkhawmte a sawm.
Sports Minister chuan sawi chhunzawmin, sports association hruaitute chu kan infiammite theihna tak tak phochhuak tura a fawng vuantu pakhat an ni a ti a,"Khawi laiah nge tihdik loh kan neih? State dang leh association dang ațangin zir theih kan nei em? Kan tih ngai loh tih ngai a awm em?" tihte inzawt fo thin turin a chah. Coach-te pawh remchang hmasaah meeting neihpui thuai a tum thu a sawi bawk.
India rama sports inkhawmpui ropui ber 38th National Games hi January 28 February 14 chhungin Uttarakhand-ah neih ani a. Services Sports Control Board (SSCB) chuan medal 121 lain pakhatna a ni. Mizoram-in Taekwondo-ah gold medal pahnih leh Wushu-ah bronze medal pakhat lain 28-na a ni a, North East State zingah Manipur (11), Arunachal Pradesh (23) leh Assam (24-na) te a pha lo a ni.
Meeting-ah hian sorkar leh sports association anga hmalak ngaihna hrang hrangte tlang tak leh inpawh taka sawi ho a ni a. Infiammite hmasawn nan sorkara thawk, sports association hruaitu leh coach te intuaithar reng a țulzia te, intihsiakna neih dawn piahlamah kumtluana inbuatsaihna kalpui that te, infiammi mi bikte tan hamthatna tam zawk ngaihtuah te, sorkar hnuaia training centre hrang hrang tangkai zawka hman te, sports equipment tha ngaihtuahte chu sawi ho zingah a tel.
Attachment
