Aizawl, the 21^st of April, 2025: Vawiin chawhma dar 11:30 khan Pu Lalnghinglova Hmar, Minister of State, Sports & Youth Services Department hovin a office chamber-ah April 26, 2025 (Inrinni) a ‘Aizawl International Half Marathon 2025’ neih tur chungchang sawiho a ni.  

Sports Minister Pu Lalnghinglova Hmar chuan ‘Aizawl International Half Marathon (AIHM)’ chu Mizoram Sawrkar, Sports & Youth Services Department leh Innovations India tangkawpin an buatsaih niin, Athletics Federation of India pawmpui a ni a, kumdangah pawh neih chhunzawm zel tum a ni tih a tarlang a. Mizoram Governor General (Dr) Vijay Kumar Singh, PVSM, AVSM, YSM (Retd) leh Chief Minister Pu Lalduhoma te chu Chief Patron niin an phurpui hle tih a sawi. “Intlansiak a nih piahlamah thalaite hriselna leh fitness a hmasawnna tur leh, ramdang leh hnamdang mithmuha Mizoram mawina phochhuak tura ruahman a ni. Tourism pawhin hma sawn phah turah kan ngai” a ti. 

Pu Lalnghinglova Hmar chuan sawi chhunzawmin, Mizo thalai mai bakah India ram chhung leh pawn hmundang atangin AIHM a tel tur an thahnem dawn tih a sawi a.  “Tunah hian Kenyan runner mi panga bakah Services atangin mi engemawzat an rawn tel dawn tih a chiang tawh” a ti.  

Aizawl International Half Marathon hi Rajiv Gandhi Stadium atanga tlan chhuah tur a ni a. Category pathum – km 21.1, km 10 leh km 5 – awmin, a tawpna pawh RG Stadium ah tho a ni dawn a ni. Registration hi mi pakhat tan Rs. 799 niin, hemi man hu eitur leh thildang dawn tur a awm dawn a ni. Lawmman hi cheng nuai sawm (Rs. 10 lakh) bawr a ni bawk ang. Intlansiak piahlamah intihhlimna pawh a awm dawn a, finishing point-ah cultural performance leh concert buatsaih a ni ang.  

AIHM a tel tumte tan online registration hi aihm2025.com/ website ah tih theih niin, Millenium Centre kawtah offline registration kalpui mek a ni. Tunkar chho ah school leh college ah te offline registration kalpui chhunzawm tum a nih thu tarlan a ni bawk.  

Vawiina meeting-ah hian half marathon tlan tura in register mi 200 chuang an awm tawh tih tarlan a ni a. AIHM tihlarna turin Aizawl hmun hrang hrangah banner leh hoarding tar niin, school, college leh gym hrang hrangah poster 200 tar a ni. Social media-ah pawh nasa lehzuala thehlar turin ruahmanna siam a nih thu tarlan a ni bawk. 

Meeting-ah hian report bakah hmalak zel dan tur sawiho a ni a. Sports & Youth Services leh Tourism Department hotute leh Aizawl SP, Traffic SP bakah Aizawl DC, Aizawl Municipal Corporation, Salem veng Local Council, Mizoram Athletics Association leh Mark Events aiawhte an tel a ni. 

Attachment