Aizawl 4th October, 2024 : Pu Lalnghinglova Hmar, Sports & Youth Services Minister chuan vawiin khan Ramhlun Indoor Stadium-ah Mizoram Civil Services Sports & Cultural Association buatsaih 35th Annual Sports & Cultural Meet, 2024 - 25 chu khuallian niin a khar.
Khuallian Sports Minister chuan Sports kan ramin kan tuipui leh kan buaipui ang hu-in National leh International level a lang phak kan la tlem chu pawi a tih thu sawiin hmathlir nei ran a, kan infiammite'n tih takzet a tan an lak a pawimawh thu a sawi a. Olympic 2036-a kan tel ve theih nan tun hunah hian sports department chuan thapui thawhin tan a la mek a. Vawiina sawrkar hnathawk he sports meet-a tel zawng zawngte chuan an fate sports lam tuipui a, an ei leh in kawngah leh insumtheihna kawngah tun atanga fuih fo turin a chah a ni.
Sawrkar hnathawkte chu ruihtheihthil laka fihlim tura chahin an hriselna ngaipawimawh turin a chah a. Fitness lamah tan la turin leh zuk leh hmuam insumna nen an nun vawng uluk turin a chah a. Kan ram Mizoram a lo hrisel zual zel nan leh sports lamah National leh International level-ah kan lan phak ve theih nana bul tantu ni theuh turin a sawm bawk a ni.
Annual Sports & Cultural Meet hi October Ni 1, 2024 atang khan neih tan niin kumtina hman thin a ni a. Sorkar hnuaia hnathawk zawng zawngte kara inunauna, inpawhna leh inthianthatna tha zawk a awm theih nana buatsaih thin a ni.
Pu Rosangliana, General Secretary chuan report pein Sports Discipline hrang hrang paruk (6) leh kum danga la tih ngai loh cultural item, Cheraw (kan tluang) leh Chheih lam hmanga intihsiakna neih a ni a. A pumpuia Champion chu Police (Un- Armed) niin lawmman pahnihna hi Group 2 (Education Department, DIET leh SCERT) te'n an la a. Lawmman pathumna hi PHED te'n an la bawk a ni. A pumpuia Medal semchhuah zat hi 403 niin Gold 110, Silver 106 leh Bronze Medal 187 a ni.
Annual Sports & Cultural Meet kharna hun hi Pu H. Lalhmingthanga, MCS, President, MCSS & CA chuan kaihhruaiin kalkhawmte lawmna thu a sawi a. Kumin MCSS & CA Sports Meet-ah hian Mizoram Sorkar hnuaia Department 65-a Sorkar hnathawk mi 1800 vel an tel a ni.
Attachment
