Aizawl the 20th December, 2022: Vawiin khan Sports Minister Pu Robert Romawia Royte chuan Chakma Autonomous Diatrict Council(CADC) in kum 50 a tlin lawmna Chawngte Helipad Ground ah a hmanpui.

He Jubilee puala Public Meeting-ah thu sawiin Pu Robert Romawia Royte chuan CADC in kum 50 a tling ta chu a lawmpui tih sawiin CADC a hotu hlui zawng zawngte leh hotu nimek te leh mipuite Golden Jubilee chibai a buk a. Chakma area a Mizoram sorkarin hmasawnna hna a thawh mekte sawilangin Lungsen atanga Chawngte inkar Electric Tower te siam mek a nih thu te, Chawngte Astroturf Football Ground tha tak zawhfel anih thu te, Chawngte P-ah Community Service Centre sak mek anih thu te, Chawngte C ah Standard Volleyball Court leh Basket Ball Court hna tan mek te, Kamalanager College ah Hostel building sak mek te leh EMRS sikul Rs 1600 lakh senga sak anih dante a tarlang a. ICT Minister chuan Kamalanagar College behchhanin ICT Deptt leh NIELIT tangkawpin IT Skill Centre an din tur thu te a sawilang bawk. Minister chuan Chawngte leh Barapansury inkar kawngpui pawh PWD in Rs 43.81 Crs senga siam an tum thu leh Chawngte leh Barapansury khawchhung kawngpuite SASCI hmanga siamthat anih tur thu a sawi bawk.

Sports Minister chuan Chawngte Astroturf Football Ground Rs 532.50 Lakh-a siam zawh thar chu a hawng nghal a. Pavillion leh Dressing Rooms 2 leh security fencing keng tel Football ground hi Chakma area a awmchhun anih avangin thalaite a lawmpui tih sawiin sikul hrang hrang te pawhin hmang tangkai se a duh thu a sawi a. A enkawltu tur Field Management Committee mumal tak din tul a tih thu a sawi bawk.

He hunah hian Pu Nihar Kanti Chakma MLA te, Dr Lalrozama IAS, Secretary SYS Deptt. te leh CADC hotu te leh hotu hlui te bakah New Delhi, Tripura leh Bangladesh atang tein palai an tel tha hle a. Chawngte leh a chhehvel mipuite tam tak an pungkhawm a, Hnam lam chi hrang hrang an entir bawk a ni.


Attachment