Aizawl, 23^rd April 2025: Sports Minister Pu Lalnghilova Hmar chuan vawiin chawhnu khan Press Conference Hall, Directorate of Sports & Youth Services-ah Aizawl International Half Marathon 2025 (AIHM2025) lo awm tur atan Press Meet a nei a. He hunah hian official AIHM2025 T-shirt a tlangzarh nghal a. Athletic Federation of India-in a pawmpui AIHM2025, a sumfai a Rs 10 Lakh lawmman awmna chu tunkar Inrinni (April 26, 2025)  hian neih a ni dawn a ni.

Chanchinbumite a kawmnaah,  Sports Minister Pu Lalnghinglova Hmar chuan Aizawlah  International Half Marathon event neih ngei tuma hma an lak dan te, a kaihhnawih thil hrang hrang leh puitlin a lo nih theih dawn tak chungchang te a sawi hmasa a.  He intlansiakna hautak zet hi, infiamna zinga hathlak ber zinga mih a nih ang seuhin a buaipui pawh hautak a tih thu sawiin Mizoram mipui te tana hriselna kawnga inzirtirna atan erawh thawm a nei lian turah an ngai a. International Half Marathon hian Mizo mipui te hriselna lama min tiharh leh se kan duh a, “Fitness Culture” hi Mizo te zingah tuh kan duh a; chutiang beiseina nen chuan he inelna hi buatsaih a ni a ti. Sports Minister chuan AIHM2025 hmangin Mizoram hi Khawvel Marathon Map-ah ziah luh a ni ve tawh dawn a, kum leh ah pawh neih kan tum dawn a, hma kan sawn zel chuan hun reiloteah Mizoramah Internation Marathon buatsaih kan tum a. Hei hian Mizoram tan khualzinmite hip kawngah thleng pawh hmasawnna min siam sak kan beisei a ni a ti.

Pu Lalnghinglova Hmar chuan Marathon te uluk taka buatsaih leh vil thin a nih avangin a tlan tur te chu pawisa chawia inziah luh a ngai thin tih a sawi a. Mizoramah a vawikhatna tur a nih avangin inziah luh man hi hmun dang te aia tlawm zawk fein ruahman a ni a, mipui nawlpui tan Rs 799 a nih laiin Naupang leh Force mi te tan tlawm zawka ruahman a ni a ti a. AIHM2025 a  tel ve ngei duh, sum lama harsatna nei te chu a lo tanpui thei  tih a sawi.

AIHM2025 hi Mizoram sorkar leh Innovations India Advertising & Event Pvt Ltd. te tangkawp buatsaih a ni a. He event hi Athletics Federation of India (AFI) pawmpui a ni a, anni hian intlansiak pawh an rawn endik dawn a ni. He intihsiak hi  Gen (Dr) VK Singh, Governor leh Pu Lalduhoma, Chief Minister te pawhin AIHM2025 Patron an nih angin an rawn uap dawn a ni.

AIHM2025 ah hian a tel duh te tan - Half Marathon (21.1 Km), Open Race ( 10 Km), Fun Race (5 km) leh Junior Category (5 Km)-ah te intlansiak tur a ni a.Intlansiakna a ti thazual  te tan Lawmman Rs nuai 10 sem chhuah a ni dawn bawk a ni.

AIHM2025 Race track hi Aizawl khawpui chhuahlam World Bank Road-ah neih a ni dawn a. A bul tanna leh tawpna tur chu Rajiv Gandhi Stadium a ni ang.

Zing dar 5:30 AM-ah Rajiv Gandhi Stadium thlen hman tur a ni a. Warm-up hi zing dar 6:00 AM-ah neih a ni ang a, intlansiak hi zing dar 6:30 AM-ah tan a ni ang. Registration hi www.aihm2025.com ah hawn a la ni a, 24th April zan dar 6:00 PM ah khar a ni ang. Tualchhung mite chuan   Rs 799 pein an inziak lut thei a, ram pawn lammite te chuan USD 30 an chawi a ngai thung a.  AIHM2025 chungchanga zawhna nei te tan helpline Number - 9863081655 a biak pawh theih bawk a ni.

Attachment

Written by: Malsawmsanga, MIS, Deputy Director