Aizawl, the 3rd October, 2022: Tukin, Zing Dar 5:45 khan Mizoram State Sports Council in a lo ruahman lawk angin PLOG RUN tluang taka neih a ni a, he hunah hian Sports Association hrang hrang te, MSSC-TATA Grassroots Football Academy Centre trainees te, MSSC Non-Residential Coaching Centre trainees te, SAI, SAG Mission Vengthlang trainees te leh MSSC Members, Officers leh staff te, Sports Department Officers leh staff te bakah midang thahnem tak 750 chuang zet an tel a ni.
Plog Run hi Chanmari kawn atangin Pu John Tanpuia, Secretary, MSSC chuan a vailiam a, Sikulpuikawn atangin Pu K. Lalrohlua, Director SYS Department in a vailiam thung a ni. AR Ground Lammual thlengin kawng dunga bawlhlawhte fawmkhawm chunga tlan a ni a, AR Ground Lammual-ah hian AMC te’n Bawlhhlawh paihna motor lo hungin bawlhhlawhte paih nghal a ni.
AR Ground Lammual-ah hian function buatsaih niin Sports Minister Pu Robert Romawia Royte chu Khuallian a ni a Plog Run kharna hun a hman bakah Fit India Freedom Run 3.0 hawnna hun a hmang nghal a ni.
Khuallian Pu Robert Romawia Royte chuan India ram chu ram in fit leh hrisel kan nih theihnan kum 2019 atang khan beihpuithlak tan anih thu sawiin, Mizoramah pawh August ni 29, 2019 khan Deputy Chief Minister Pu Tawnluia hovin a thawhkhatna hman a ni a, kum 2020 khan a thawh hnihna hman leh niin COVID-19 hruipui leng vangin kan han khaihlak hlek a, kuminah a thawh thumna kan hmang thei ta hi a lawmawm hle a ni, a ti. Khawvel ram changkangte chuan taksa in fit hi an ngaih pawimawhna a rei tawh a, India ram pawh hemi kawngah hian harh tharin nasa takin tan a la a, infiamna (sports) huangah pawh nasa taka hma la in Mizoram ngei pawhin a hlawkna leh a hlawhtlinna kan infiammite atangin kan hmu tan ta a ni, a ti.
In fit tura taksa insawizawi (exercise) hi kan nitin nunphungah kan beh tir a, habit tha tak atana kan neih theuh a pawimawh a, nitin darkar chanve tal taksa insawizawina atana hun kan pek theih chuan kar lovah a hlawkna kan tel nghal dawn a ni, a ti a. Taksa a in fit chuan kan hrisel ngei ngei a, natna tam tak kan buaipui zunthlum, thisen sang etc., lakah thui tak min veng thei bawk a, kan thluaka thisen zam a kal that avangin keimahni pawh kan phurin kan thluak pawhin chak zawkin hna a thawk thei dawn a ni, a ti a. Pathianin taksa min pek enkawl uluk hi kan mawhphurhna a nih tel ve tho bawk avangin taksa insawizawi hi a Pathian thu bakah kan tih ngei ngei tura kan ngaih a pawimawh hle a ni, a ti a. Taksa hrisel, rilru hrisel neiturin leh mizo hnam te hi India rama fit ber ni tura tan la zel turin mipuite a chah a, naupangte leh infiamna lama tuite tan sawrkarin kawng a hawn belh sak zel dawn a, a thlahthlam dawn lo tih a sawi bawk a ni.
A.R. Ground-a an intawhkhawm hnu hian Fit India Freedom Run 3.0 hawnna in khawm neih a ni a, hetah hian Dr. Lalrozama, Secretary, SYS Department in inlawmna thu a sawi a, Khuallianin thusawi paha Fit India Freedom Run 3.0 a hawn hnuah Pu TC Pachhunga, Vice-Chairman, SYS Development Board in lawmthu sawiin hun a khar a ni.
He hunah hian Dr. K. Pachhunga, MLA & Vice Chairman Bamboo Development Board, Er. H. Lalzirliana, MLA & Vice Chairman, Road & Infrastructure Development Board, H. Biakzaua, MLA & Vice-Chairman, Agriculture Development Board leh Pu Ramthanmawia, MLA East Tuipui AC te chu an tel a ni.
Plog Run hi Central Sawrkar in a FIT INDIA FREEDOM RUN 3.0 programme a kalpui mek zinga ki khat a ni a, a thil tum ber chu mipuite hnena FAINA pawimawh zia inzirtir a ni.
Attachment
