Aizawl, the 20^th of August, 2024: Sports & Youth Services Minister Pu Lalnghinglova Hmar chuan nizan (August ni 19, 2024) dar 8:00 khan  LPS Arena, Falkland-a Zoliana Royte Memorial Indoor 5S Hockey Tournament buatsaih chu khuallian niin a hawng a, Sorkarin infiamna uar bik tur a thlan zingah hockey a tel thu a sawi. 

Sports Minister Pu Lalnghinglova Hmar chuan Mizoramin infiamna a buaipui dan chu thlak hret hret a ngaih thu a sawi a. ‘Eng sports discipline ah nge India leh Asia, khawvel huap thlenga hming kan chher ve theihna ni a, eng infiamnate nge thalaite eizawnna siamsak thei a, kan uar bik ang’ tih ngaihtuah chungin Sorkar a inher rem dawn tih a sawi.  Hemi chungchanga inrawnkhawmna, kumin June thlaa Mizoram Sports Conclave Aizawla neih chu a thupuiah ‘Vision 2036 Olympics’ tih a nih nghe nghe thu a sawi. Sports Minister chuan India in Olympic Games 2036 thlen a tum a, Mizoram atanga infiammi tam thei ang ber tel ve kan duh a ni tiin, eng infiamnaah nge India a that a, eng game ah te nge kan lo inbuatsaih ang tih uluk takin kan ngaihtuah mek a ni a ti a. Hockey chu khawvel huapa India thatna a nih angin, Vision 2036 Olympic Games-a infiamna thlan bik tur zingah a tel tih a sawi a ni. 

Pu Lalnghinglova Hmar chuan sawi chhunzawmin, hmeichhe hockey-ah Mizoramin Olympian kan neih bakah a khat tawkin International player kan nei reng a, mipaah erawh tanlak a la ngaih thu a sawi a. Kawnpui-a Boys Hockey Academy chu tha zawk leh changtlung zawka kalpui tum in, thawhpui tur (partner) zawnga hma paw lak mek a nih thu a sawi a ni. Sports Minister chuan Indoor 5S Hockey Tournament buatsaihtu Aizawl District Hockey Association bakah Pu Zoliana Royte (L) nupui Pi Rozingi leh a fate chungah lawmthu a sawi a, tournament hlawhtling tak a nih ngei theih nan duhsakna a hlan nghal bawk a ni. 

He tournament buatsaihna’n a sum thawhtu Pi Rozingi w/o Pu Zoliana Royte (L) pawhin thu sawiin, tournament chu thalai, a bikin hockey player te ta’n chona thlentu nise, Indian hockey-a lang tham ni tura hma an lak chu an duhdan ber a nih thu a sawi a. Pi Lalrampari, President, Aizawl District Hockey Association chuan Mizoram hockey thlen chin tlangpui a tarlang a. A bikin hmeichhe hockey leh international leh national umpire te, coach chhuanawm tak tak engemawzat an awm a. India team-ah pawh senior leh junior ah Mizo hmeichhia an tel tih a tarlang a ni.

Pu Zoliana Royte (L) Indoor 5S Hockey tournament-ah hian mipa team 18 leh hmeichhe team 15 an chhuak a, pool pali ah ve ve then niin, pool tina a sang te’n knockout stage an khelh chhunzawm dawn a ni. August ni 24, 2024 (Inrinni) ah final leh tournament kharna neih tura ruahman a ni. Mipa leh hmeichhe team champion te’n Rs. 40,000 bakah trophy leh certificate an dawng dawn a, runners up in Rs. 20,000 leh trophy bakah certificate an dawng ang. Semi final a chak lo te’n Rs. 5,000 theuh an dawng dawn bawk a ni. 

Attachment