Dated Aizawl the 29 August 2025: Vawiin khan Sports Minister Pu Lalnghinglova Hmar chuan Vanapa Hall-ah, ICFAI University Mizoram Freshers’ Social chu khuallian niin a hmanpui.
He hunah hian khuallian Sports Minister Pu Lalnghinglova Hmar chuan thusawiin, ICFAI University Freshers’ Social a hmanpui thei chu lawmawm a tih thu a sawi a. Zirlaite chu taima tura fuihin, an zirlaiah leh an thiltih apiangah chhawr tlak leh ram tana chhenfakawm nih tum zel turin a chah a. Sawrkarin Zirlai leh thalai lehkha thiamte bakah thiamna bik neite tan India ram pawn thlenga hna an hmuh theihna tura ruahmanna a siamsak dante tarlangin, Zirlaite chu hna zawngtu chauh nih tum lova midangte hna siamsaktu thlenga nih tum turin a chah a. Hmathlir nei tha tura fuihin, Minister chuan, Mizorama Rail lo lut tur avang te, khawvel hmasawnna avang hrim hrim pawhin Tourism huangah pawh hna a tam chho dawn chauh tih a sawi a. SOcial Media hman danah fimkhur tura Zirlaite chu fuihin, theitawp chhuaha ruihhlo laka inthiarfihlim turin a chah a. Freshers’ Social chu hlim taka hmang turin duhsakna a hlan nghal bawk a ni.
Vawiina ICFAI University-in an zirlai lut tharte lawmna hun an hman hi ICFAI University, Mizoram Vice Chancellor, Prof. Ginlianlal Buhril chuan kaihruaiin kalkhawmte lawmna thu a sawi a. ICFAI University-a thawktute aiawhin Dr. Aries Zoengliana hnen atangin thusawi ngaihthlak a ni a. ICFAI University-a lo zir chhuak tawhte aiawhin Pu Malsawmsanga, Asst. Professor, IASE chuan thusawina hun a hmang a. V. Lalruattluanga, 1st Sem MBA-chuan zirlai lut tharte aiawhin thu a sawi a. Freshers Organising Committee Chairman, Dr. Lallawmzuala Khiangte chuan lawmthu sawiin hun hi a khar a ni.
Attachment
Written by: N Vahneichhi, MIS, IPRO
