Dated Aizawl, the 9^th October, 2024: Vawiin chawhnu dar 2:00 khan Khawvel huap leh India ram pum huapa Infiamna lama hmingthate chawimawina Tangka fai hlanna (Incentive Cash Awards to Meritorious Sportsperson) chu Dawrpui Multipurpose Centre, Aizawlah neih a ni a; he hun hi Sports and Youth Services Minister Pu Lalnghinglova Hmar chuan khuallian niin, Infiammite hi chawimawina Tangka fai a hlan nghal a ni.

Khuallian Minister Pu Lalnghinglova Hmar chuan kalkhawmte hmaah hian thu sawiin, "Mizoram Sawrkar chuan infiammite banah a kai dawn a. A bultanna’n “Bana Kaih (Handholding) Scheme” hnuaiah Mizoram pum huapa Sports coaching leh talent identification kalpui na’n cheng vaibelchhe hnih leh nuai sawmnga (Rs. 2.5 Crore) pawm a ni tawh" a ti a. Sports-a kan thlen chin a la sâng tawk lo chungin, hnam leh hnam, ram leh ram intihsiakna, Mizo hnam chawisân theihna hmanraw pawimawh tak a nih avangin tih tak taka sports kalpui chu a tul tak zet thu a sawi a. Sawrkar chuan  Incentive Cash Award Scheme chu a ennawn mek thu tarlangin, Olympic discipline ni lo te pawh tel tura ruahmanna siam a nih thu a sawi a. Olympic Games, 2036 ah chuan Mizote a tam thei ang ber kan tel ve theihna turin beiseiawm sports discipline thlûr bik neia Sawrkarin  theih tawp a chhuah tur thu a sawi bawk a ni.

Hun hman hi Pu Lalramsanga Sailo, IRS, Secretary to SYS Dept, Govt of Mizoram chuan kaihruaiin kalkhawmte lo lawmna thu a sawi a. Pu C Lalremsanga, Joint Director, Sports & Youth Service Department chuan Incentive Cash Awards kalpui dan tur report tawi pein, chu chu lawmpuina Tangka fai semin a zui nghal a ni.

Vawiina lawmpuina Tangka fai hi 1st April 2023 atanga 31st March 2024 chhunga National leh International-a infiammi lawmman (medal) dawngte hnenah sem a ni a. Incentive Cash Award hi Incentive Cash Award Scheme 2022 tlawh chhana siam niin, hemi hnuaiah hian medal latu player te enkawl a, inelna an neih hmuna hruaitu Official te hnenah player te pawisa dawn zat atanga chhuta 25% Cash Award pek an ni.

Tun tuma Incentive Cash Award hi a vaiin Rs 1,10,92,000 (cheng Vaibelchhe khat nuaih sawm singkua leh sanghnih) niin, Infiammi 416-te hnena sem a ni a, heng Infiammite zinga 276 te chu mipa niin, hmeichhia 131 an awm a, Contingent Official 9 an awm bawk a ni.

Heng chawimawina Tangka faite hi Discipline hrang hrang 15; Badminton, Basketball, Belt Wrestling, Boxing, Football, Hockey, Tennis, Sepaktakraw, Shooting, Table Tennis, Taekwondo, Volleyball, Weightlifting, Wrestling leh Wushu te a gold, silver leh bronze medal latu infiammi te hnenah sem a ni.

Tun tum Incentive Cash Award semnaah hian Lalremsiami- Hockey, Jeremy Lalrinnunga- Weightlifting, Lalruatfela- Weightlifting leh Cindy Lalruatpuii Colney- Football te hi International Level-a lawmman la thei an ni a. Mimal Anga sum fai la hnem ber chu Lalremsiami, Hockey player niin, ani hian  Indian Women Hockey Team-a tel a a lawmman dawnte avangin, Rs. 1,45,000 lai a dawng a ni.

Attachment

Written by: N Vahneichhi, MIS, IPRO