Aizawl the 23^rd August, 2024: Vawiin chawhnu khan Sports & Youth Services Minister Pu Lalnghinglova Hmar chuan a office chamber-ah Khelo India State Centre of Excellence (KISCE) a thawktu lak thar te a kawm a, KISCE chu Centre of Excellence a nih ang ngeiin Mizorama infiammi tha ber ber chherchhuaktu nih tum turin a chah. 

Sports Minister chuan KISCE-a awm tur infiammi talent nei tha haichhuah leh thlan kawngah te, training pek danah te theihtawp chhuah thar a ngai a ni a ti a. Mizoramin infiamna kawnga hma a sawnnaah KISCE a thawkte chuan mawhphurhna pawimawh tak an nei a, hun puma thawk tur an nih angin, a hmuna riahchilh tum a nih thu a sawi a ni. 

Minister Pu Lalnghinglova Hmar chuan sawi chhunzawmin, sports-a hlawhtling tur chuan a tha ber zinga tel a ngai a, induhsakna awm lovin, result tha nei ngei turin dik leh taima taka thawk turin KISCE staff lak tharte a chah a.  National Games chu sawi loh, Northeast Games-ah pawh Mizoram result a la tha tawk lo a. Midang kan lehpelh theih hmain, an pen ruala pen phawt turin theihtawp kan chhuah a ngai a ni a ti.

Vawiina inkawmhonaah hian Pu Lalramsanga Sailo, Secretary, Sports & Youth Services Department leh Pu H. Lalhmingthanga, Director, Sports & Youth Services te’n Minister an tawiawm a ni.

Attachment