Aizawl, the 15^th June 2024: Sports & Youth Services Minister Pu Lalnghinglova Hmar chuan vawiin khan Govt. Mizo High School Multipurpose Hall, McDonald Hill-ah ni thum awh “Kukkiwon Advanced Taekwondo National Poomsae Seminar Training” kharna hun a hmanpui. He Seminar Training hi Taekwondo Federation of India buatsaih niin Mizoram Amateur Taekwondo Association (MATA) in a thleng a ni.

Kukkiwon Advanced Taekwondo National Poomsae Seminar Training-ah hian South Korea atanga lo kal Grand Master Professor Hee Do Kim leh Grand Master Lee Jae Ku ten theory leh practical class an la a, Mizoram, Assam leh Arunachal Pradesh atangin mi 74 an tel a, Training completion certificate an dawng vek a ni.

He hun hmanpuitu Sports Minister Pu Lalnghinglova Hmar chuan Grand Master Professor Hee Do Kim leh Grand Master Lee Jae Ku te inpekna fakawm a tih thu a sawi a, Mizoram Sports Conclave an rawn chhim tel bawk avanga lawmthu sawiin Mizoram atanga seminar a tel te bakah Mizoram pawn Assam leh Arunachal Pradesh atanga chhimtu rawn kalte chungah lawmthu a sawi bawk a ni.

Pu Lalnghinglova Hmar chuan thalaite infiamna kawnga mihlawhtling ni tura chherchhuah hi Mizoram sawrkar tum pawimawh ber a nih thu sawiin, National Level mai bakah International Level a thangchhuah thei turin thalai infiammite tan tan kan la a ni, a ti a. Kum 2036 Olympic ah chuan Mizo thalaite thahnemtak India ram awiawha an tel theih nan leh medal hlu tak an rawn hawn ngei theih nan tun atang hian hmachhawp mumal tak nen hma lak tum a ni, a ti a. Taekwondo chu Korea ram atanga chin chhuah a nih vangin Olympic leh Asian Games-ah pawh South Korea hian medal an la hui hnem ber a, chutih laiin Afghanistan, Israel, Nigeria, Colombia etc., atangin medal sual chhuak an awm tawh a, hei vang hian Mizo thalaite pawhin tih tak takna nena kan beih chuan kan hlawhchhuak ve thei dawn tih hi a chiang a, hemi tur erawh hi chuan nasa taka tan kan lak a ngai a ni, a ti a. Mizote hi a tlangpuiin a tira kan phur hlut a, kan peih rei thin lo hi a pawi a ni a ti a, National leh International level-ah mi ti tak takte nen kan inel tawh thin si a, keini pawhin kan tih tak tak ve a ngai tawh a, kan thei dawn lo a nih chuan bansan mai a tha zawk tiin thalai kalkhawmte chu taimakna leh tumruhna, insumtheihna leh dawhtheihna nen theihtawp chhuah turin a fuih a ni.

“Kukkiwon Advanced Taekwondo National Poomsae Seminar Training” kharna hun hi MATA President Prof. Rualkhuma Colney-in a kaihruai a, MATA General Secretary Pu Joseph Thansanga’n report pe in, Pu F. Lalhmingliana, MATA Treasurer-in lawmthu sawina hun hmangin a khar a ni.

Attachment

Written by: Andrew H Lalremruata, MIS, Deputy Director