Aizawl, the 25th October 2024 : Nizan dar 8 khan Sports and Youth Services enkawltu Minister Pu Lalnghinglova Hmar chuan Body Building & Fitness Association of Mizoram (BBFAM) in Mizoram State Sports Council puihnaa LPS Fitness Festival, LPS Arena Falkland Venga an buatsaih chu a hmanpui.
Pu Lalnghinglova Hmar chuan Mizo mipui tam tak hi ei leh in kan in uluk loh avangte leh kan taksa kan sawizawi that loh avangtein kan hriselna in a tuar a, a bik takin tunhnaia Mizo mipa, a hun lo taka boral kan tam em em a, hei hi zu leh ruihthei thilah kan talbuai avangte pawh nia sawi a tam hle a, hei hi kan veitlan a tul hle a. Hengte avang pawh hian hnam hrisel lo tak kan ni em aw tiin min ngaihtuah tir thei a, chuvangin mitin hriselna lam hi kan ngaihpawimawhin hemi kawngah kan infinchhuah leh tan kan lak thar a tul hle a a ni, a ti. BBFAM in Fitness Festival an buatsaih chu lawmawm tiin thalai heti zat LPS Fitness Festival a tel leh chim an awm hian thalai ten fitness an tuipui zia a tilang a, sum senga mahni taksa enkawl duhtu thalai te chu an fakawm a ani, a ti.
LPS Fitness Festival hi October ni 16 khan tan niin nizan kha a tawpna a ni a. Nizana Junior Category ah Mister, Mr Physique leh Mister Mizoram thlanna te neih a ni.
Attachment
Written by: Pratap Chhetri, MIS, Deputy Director
