Lunglei the 10th November, 2022 : Sports & Youth Services Minister Pu Robert Romawia Royte chuan vawiin khan Lungleiah Sports hmasawnna ruhrel thar te a hawng. Heng sports infrastructure te hi PMJVK Scheme kaltlanga cheng nuai 569.61 senga ruahman Thuamluaia Mual Synthetic Football Turf phah thar leh MSSC-TATA Trusts Grassroots Football Academy pariat (8) te an ni.
He hunah hian Lunglei West bialtu MLA & Cabinet Minister Pu C. Lalrinsanga chu Chief Host niin Pu T.C. Pachhunga, Vice Chairman SEDP Board for Sports chu khualzahawm a ni. Lunglei HPC Vice Chairman Pu Lawmawma Tochhawng, MYC Chairman Dr Vanlaltanpuia leh Bamboo Development Board Vice Chairman Dr K. Pachhunga te chu he hunah hian khual thlengtu (Hosts) te an ni.
Chief Host Lunglei West bialtu MLA & Minister Pu C. Lalrinsanga chuan Thuamluaia Mual phul lem phah thar chu hmasawnna ropui tak a ni tiin he sports infrastructure pawimawh tak tih changtlun kawnga hma la tu Sports & Youth Services Minister Pu Robert Romawia Royte leh a thawhpuite chungah lawmthu a sawi a. Lunglei District- a sports infrastructure din mekte chuan hun lo kal zel turah rah tha tak chhuahin infiamna lamah Lunglei District-ah hmasawnna tam tak a thlentu leh hlawhtling tura infiammi chherchhuahna hmanraw tangkai tak an la nih ngei a rin thu a sawi a ni.
Sports Minister Pu Robert Romawia Royte chuan Mizorama sports discipline hrang hrang leh sports infrastructure tih hmasawn zel kawngah Sports and Youth Services Department chuan theihtawp chhuak mek zelin Sawrkar laipui kaltlanga ruahmanna lian tham tak tak thawh chhoh mek anih thu a sawi a. Lunglei District-ah pawh ruahmanna hrang hrang - District Sports Complex, Rahsiveng, bakah Futsal ground engemawzat,Leitlangpui Hockey Ground, Futsal Ground Ramthar Veng, Zobawk Residential Sports School, Electric Veng Astro Turf Football Ground sak hna te kalpui mek niin heng sports infrastruture ruahman te hmang tangkaia Lunglei District chu sports hub pawimawh tak ala ni chho dawn a ni, a ti a. Lunglei khawpui hmasawn zelna kawnga pawimawh tak Lunglei Municipal Council chu Lunglei mipuite tana lawmawm tak a ni tiin, LMC din anih chuan thuneihna semzai na (decentralization of power)a takin kan hmu anga, mipui thlan an aiawhten khawpui enkawlna kawngah mawhphurha leh thuneihna sang zawk an nei dawn a ni, a ti a. Lunglei khawpui chhung kawng siam pawh tun thla chhunga zawh fel anih tur thu leh veng chhung inkalpawhna kawng te pawh PWD in an siam thuai tur thu a sawi bawk.
Vawiin program hi Dr. Lalrozama, Secretary, SYS Department in kaihruaiin host-te, SYS Department hotute, Mizoram Football Association leh Lunglei District Football Association aiawhten thusawina hun an hmang a. Pu John Tanpuia, Secretary, Mizoram State Sports Council in Technical Report pe in, Pu Lawmawma Tochhawng in lawmthu sawina hun a hmang.
C. Thuamluaia Mual, Lungleia a Synthetic Footbal Turf phah hna hi District Sports Complex, Linglei PMKVK Scheme 2020-21 kaltlanga cheng nuai 569.61 senga ruahman a ni a.
He khelmual phullem phahna tur lungphum hi April ni 29, 2022 khan Sports Minister Pu Robert Romawia Royte in phumin Leitlang Consultants, Lunglawn Lunglei hnuaiah M/s Decor India, GS Road, Guwahati in an thawk a. July ni 20, 2022 khan hnathawh tan niin December ni 1, 2022 khan tha taka zawhfel a ni.
Synthetic Football Turf phah chin area hi 105 x 70 metres niin play area hi 102 x 68 metres a ni. He phullem phahna atan hian New Technology Drain Board System hman niin, a sir kil hnih ah tui paihna tha tak siam a ni a, perforated pipe hmangin tui hi lakkhawm a ni. A sir kual ah hian Footpath atan chequered precast cement concrete tile phah a ni bawk. Artificial Grass hi ACT Global Company, USA te siam niin, Goal Post leh Net bakah Corner Flag te pawh dah tel a ni.
Vawiin program ah hian Lunglei District huamchhunga Mizoram State Sports Council - Tata Trusts Grassroots Football Academy centre pariat - Serkawn, Haulawng, Electric Veng, College Veng, Lunglawn, Lungsen, Tlabung leh W.Bunghmun te pawh hawn an ni a. MSSC-TATA Trusts Grassroots Football Academy hnuaiah hian Mizoram pumah Centre sawmruk (60) awmin tun dinhmunah trainees 1800 vel an awm mek a ni. He academy atan trainer tur te pawh uluk taka thlan niin AIFF/AFC/FIFA hnuaia Coaching License nei te an ni.
Vawiin program-ah hian Exhibition Football Match - Lunglei Government College vs Government JB College neih a ni a. Pu Lalnghinglova Hmar, Honorary Secretary, Mizoram Football Association chuan December ni 10 atanga ni 30 chhunga Thuamluaia Muala khelh tur Lianzuala Chhangte Age Group Football League a hawng bawk a ni.
Attachment
Written by: C. Lalremruati, MIS, DIPRO - LUNGLEI
