Aizawl the 24^th June, 2023: Tukin zing khan Sports Minister Pu Robert Romawia Royte chuan  Falkland Venga Mizoram Rifles Association (MRA) Shooting Centre siam lai mek chu a hmunah kalin a tlawh a, Minister hi Mizoram Rifles Association hotuten an tawiawm a ni.

Sports Minister  chuan MRA  leh Falkland Local Council ten thalaite mamawh a ni tih hria a Falkland hmun remchang taka silai kah zirna hmun siama, anmahni suma bul an lo tan chu lawmawm a tih thu a sawi. Silai kah hmang a in el na ah lawmman (medal)  lak tur a tam avangin ngaihpawimawh a tul hle tiin  sawrkarin sum tam tak a sen lohna sports discipline mah nise Mizo silaikapthiamten state pawn atangin medal tam tak an kapchhuak tawh a ni, a ti. Hmunhma tha tak nen chuan silaikapthiamten hlawhtlinna sang zawk an neih ngei a beisei awm hle a ti. 

MRA Shooting Centre-ah hian building 1 leh shooting range metre 50-a awm dawn a, a sak chhunzawm nan sum ngaihtuahsak nghal a tum thu sawiin Pu Robert Romawia Royte chuan  PMJVK project tharah telh a nih theih nan hmalak a nih tur thu a tarlang nghal  bawk. He Shooting Range hi Mizorama Qualified 50-Metre shooting range hmasaber leh awmchhun tur a ni.

Pu Lalremtluanga, President, MRA pawhin thu tawi sawiin Sports Minister Pu Robert Romawia Royte in MRA Shooting Centre saklai a tlawh thei chu  lawm tiin hna chhunzawm a, sak puitling a nih theih nana sum ngaihtuahsak an nih dawn avangin MRA aiawhin Minister hnenah hian lawmthu a hrilh nghal bawk. Centre saklai mek  enhonaah hian MRA hruaitute, Silaikapthiam tha hnem  tak leh Falkland VC te an tel.

MRA Centre bula Falkland Local Council ten Sports Centre tur an ruahman chu Sports Minister hian a tlawh nghal a, Local Council-ten rawtna an neih ang angte chu a  bial changtu MLA  Chief Minister hnenah  thlen a,  a lo sawipui tur thu a hrilh a ni.

Attachment