Aizawl, the 13th July 2022: Mizoram State Sports Council-in infiamna zirtirna (naupang Kum 6-12 te tan) atana a buatsaih MSSC Non-Residential Coaching Programme chu vawiin hian Sports Minister Pu Robert Romawia Royte chuan a hawng.
He Non-residential hawnna hun Hawla Indoor Stadium, Republic Vengthlanga neih ah hian Pu Robert-a chuan programme hawnna a neih rualin, infiamna lamah hmasawnna dik tak thlentu a nih a beisei thu a sawi a, "Hei hian Mizoram infiamna huangah awmzia a neih ngei ka ring tak zet a, khawvel huap inelna sang ber thlir chhunga hma lakna a nih avangin, naupang tawiawmtu nu leh paten in fate dinhmun hrethiam a, thahnem ngaihpui turin ka sawm nghal che u a ni," a ti.
He programme hi sports discipline paruk (6) a bultan niin, discipline dangte tan pawh hawn belh zel tura ruahman a ni.
Sports Council hnuaia Coach-ten zirtirna pein, mi 52-in Basketball an zir a, mi 34-in Boxing zir ve thungin Hawla Indoor Stadium-ah kalpui ani a, Mizoram Table Tennis Hall, Mission Vengah mi 38-in Table Tennis, Ramhlun Sports Complex-ah mi 39-in Tennis, TNT Weightlifting Hall, Muanna Veng ah mi 34-in Weightlifting; Regional Sports Training Centre, Saidan, Kolasib ah mi 30-in Wrestling an zir dawn a ni.
Sports Council Secretary Pu John Tanpuia chuan 2019-a Mizoram sorkarin sports policy a neih atanga hma lakna pawimawh a nih thu a sawi a, a duh apiangte tan man chawi ngai lovin coaching hi a zawm theih a ni a ti bawk.
Sports Promotion Officer Pu H. Laldinsanga chuan zirna hlawm khat atan thla li chhung ruahman a ni a, heta ti thate hi chhawm zui zelin mi dang tan hlawm dang buatsaih leh zel a ni bawk ang, a ti.
Hawnna inkhawmah hian Sports Board Vice Chairman Pu TC Pachhunga, Mamit MLA Er. H. Lalzirliana, bialtu AMC Councillor Pu David Zohmangaiha, MSSC Memberte, leh a kaihhnawih sports association hruaitute an tel a, naupangten an zirlai tha takin an entir nghal a ni.
Attachment
