Aizawl dated 24^th April 2025: Vawiin chawhnu khan AR Lammual ah Mizo Student Union Cup 2025 kharna hun chu Pu Lalnghinglova Hmar in a hmanpui a. Pu Lalrampanmawia, Treasurer, MSU chuan kharna hun hi kaihruaiin Pu B.Lalkhawngaihzuala, President, MSU leh Prof. S Sundar, Director, NIT ten thusawina hun an hmang a ni.

Sports & Youth Services Department Minister Pu Lalnghinglova Hmar chuan MSU Cup 2025 tluang tak leh hlawhtling tak a buatsaih a ni chu lawmawm a tih thu sawiin, zirlai nih chhung chuan zirna dah pawimawh hmasak ber a tul thu a sawi a. Chutihrual chuan taksa hriselna leh rilru hriselna chu kalkawp tlat a nih avangin taksa sawizawi nana hun siam a pawimawh thu a sawi.

India in thlen a tum, Olympics 2036 ah mizo thalai tam thei ang ber an tel theih nan Pu Lalnghinglova Hmar chuan Mizoram Sawrkarin Vision Olympics 2036 kalpui a tum thu a sawi a. National Games hnuhnung ber a Mizoram dinhmun enin infiamna discipline hrang hrangah hmalakna tur tam tak a awm thu a sawi. 

Sports Minister chuan Mizoram sawrkar leh Innovations India tangkawpin April ni 26 hian Aizawl International Half Marathon a buatsaih tur thu sawiin, hei hi taksa sawizawi leh hriselna ngaih pawimawh a tulzia mipui hnen a zirtirna tura ruahman a nih thu a tarlang a. Hei aia changtlung leh lian tham zawk a buatsaih chhunzawm tum a nih thu a sawi bawk a ni.

MSU Cup 2025-ah hian Aizawl district chhunga College 8 te an tel a. Football (mipa), Volleyball (hmeichhia) leh Cricket (mipa) ahte inelna buatsaih a ni. Govt. T.Romana College chu Football ah an Champion a, Govt. Hrangbana College chu Volleyball leh Cricket ah an Champion thung a ni.

Attachment

Written by: Dr. Hmingthanzuala, MIS, IPRO