Aizawl, 7th March, 2023: Vawiin khan Mizoram State Sports Council (MSSC) Sports Complex, Muallungthu-a Synthetic Turf Football Ground chu Sports Minister Pu Robert Romawia Royte chuan khuallian niin a hawng.
Sports Minister chuan thu sawiin, ei leh bar a intodelh tur leh thilsiam tam zawk dekchhuak tur chuan a ram a chengten hriselna tha an neih a pawimawh hle a, rilru leh taksa hrisel nei turin Sports Department chuan hma a la mek zel a ni, a ti. Mizoram hmun hrang hrang ah thalaite infiamna tur buatsaih mek zel niin, thalaiten an chhawr tangkai hle a, sawrkarin infiamna chi khat mai nilovin infiamna chi hrang hrang te tihmasawn turin chak taka hna a kal pui mek thu a sawi. Pu Robert Romawia Royte chuan Mizorama Synthetic Football Turf phah te chu quality tha tak tak te an nih thu sawiin, FIFA Quality Test paltlang tawh te pawh awm in, vawiin a phah tak pawh hian FIFA Quality Test a paltlang ngei a beisei thu a sawi bawk a ni.
Khuallian chuan ‘Holiday Sport’ buatsaih turin Sports Department chuan hma a lak mek thu a tarlang a. Holiday hi zirlai naupang leh thalaite chuan phone khawih nan an hmang nasa hle a, hei hian an rilru leh taksa hriselna nasa takin a tihniam a ni, a ti. Holiday Sport buatsaih a nih chuan naupang, thalai, nu leh pate’n playground ah taksa sawizawiin hun tam zawk an hmang thin ang a,chu chuan an rilru leh taksa hriselna nasa takin a puih theih tur thu a sawi bawk a ni. Pu Robert Romawia Royte hian Aizawl South-III MLA Football Tournament chu hawnna a nei nghal bawk a ni.
Khualzahawm Prof. F. Lalnunmawia pawhin thu sawiin, infiamna hmun tur tha tak a bial chhung a hawn a ni chu lawmawm a ti hle a. Play Ground siam nan sum tak tak sen a ngaih thin avangin mipuite chuan neitu thinlung pu a, duat taka enkawl turin kalkhawmte chu a sawm a ni.
Synthetic Turf Football Ground hawnna inkhawm hi Dr. Lalrozama IAS, Secretary, Department of Sports & Youth Services (SYS) chuan kaihruaiin, Pu K. Lalrohlua, Director(SYS) chuan lawmthu sawina a nei a ni.
Mizoram State Sports Council (MSSC) Sports Complex, Muallungthu-a Synthetic Turf Football Ground hi Khelo India Scheme, Ministry of Youth Affairs & Sports,Government of India atanga sum hmuh cheng nuai 500 seng a sak niin, ACT Global company,USA te siam a ni. Football turf phah chin area hi 110x74 mts niin fencing, Pavilion leh paver block footpath te siam tel a ni bawk.
Attachment
![](/uploads/attachments/2023/03/7160ae51554bfdb7d6fd89406c6533fb/posts-55870-whatsapp-imjkage-2023-03-07-at-30814-pm-1.jpeg)
Written by: Zonunchama Ralte, MIS, IPRO