Aizawl, the 29th of March, 2025: Nizân dar 8:00 khan Pu Lalnghinglova Hmar, Minister of State, Sports & Youth Services Department, Aizawl West-II bialtu MLA ni bawk chuan ‘Ralliana & Rokunga - YMA Sports Complex’, Tuikual South-a mi chu a duh apiangte hman theih turin a hawng.
Sports Minister Pu Lalnghinglova Hmar chuan Sports Complex siamna tura ram petu Pu Ralliana (fam) chhungte leh Pu Rokunga te thiltih chu chhuanawm a tih thu a sawi a. A hlawhtlinna’na theihtawp chhuahtu YMA, Local Council leh sawrkar hmasaa mawhphurtute chungah pawh lawmthu sawiin, sports complex chu naupang zawkte chher nan tangkai taka hmang turin a chah bawk. Uluk taka enkawl tur leh, zu leh ruihhlo tihna hmun chang lo tura vil zui turin Tuikual South khawtlang hruaitute a sawm nghal a ni.
Sports Complex hawnnaah hian Pu F. Lalhmangaiha, Adviser, Tuikual South Branch YMA chuan hunserh a hmang a. Pu Lalrinfela, Work Supervisor-in Technical Report pe in, Pu PC. Laldinpuia, Secretary, Tuikual South Branch YMA in lawmthu sawina a nei bawk.
Pu Ralliana (fam) chhungten an pa hriatreng nan an ram chu Tuikual South Branch YMA hnenah an pe a, chu chu Ralliana Memorial Basketball Court tih a ni a. A bul chiaha ram neitu Pu Rokunga chuan ṭhalaite tuihalna hriain a ram chu YMA hnenah a pe ve leh a, hetah hian Futsal Ground sak niin Rokunga Futsal Ground tih a ni thung. Infiamna hmun pahnih awm dun ta chu a hming atan ‘Ralliana & Rokunga - YMA Sports Complex’ ti a vuah a ni ta a ni.
Sports Complex hawnna hi Pu R.Laldinthara, Tuikual South Branch YMA President chuan a kaihruai a ni.
Attachment
