Aizawl, the 12^th January, 2024: Tukin Zing Dar 7:30 khan Sports & Youth Services Department Minister leh MSSC President ni bawk Pu Lalnghinglova Hmar chuan Mizoram State Sports Council hnuaia Sports Association hrang hrangte enkawl hmunhma a tlawh a, he hunah hian MSSC Secretary Pu John Tanpuia chuan a tawiawm a ni.

He hunah hian Sports Association hrang hrang hruaitute chuan Sports Minister Pu Lalnghinglova Hmar hi lo dawng sawngin, an mahni hmun ngeiah an mamawhte an lo sawipui a, Sports hmunhma tihchangtlun dan tur hrang hrangte sawiho nghal a ni bawk.

Sports Minister Pu Lalnghinglova Hmar chuan, "Sports lama kan ngaih pawimawh hmasak tur chu a infiammite leh a enkawltu sports association a ni a, chuvangin sports association hmunhma MSSC hnuaia awmte hi kan tlawh a ni," a ti a.  "Sports Association hruaitute a taka kan inkawm thei leh a hmun ngeia an mamawhte ka hmuhpui thei hi ka lawm a, a harsatnate min hrilh a, kan theih chinah theihtawp chhuahpui kan tum ang," a ti.

Sports Minister chuan, "Kan sawi tawh angin medal la thei tura inchher kan tum dawn a, chulam hawi chuan ke pen zel kan tum a.  Kan hmunhma neih ang ang te hi a tha tawk lo a nih pawhin hmang tangkai ila, dim leh duat takin i enkawl ang u," a ti.

Mizoram State Sports Council in a enkawl, Ramhlun Sports Complex tia hriat ah hian Sports Association hrang hrang - Boxing, Volleyball, Basketball, Football, Wrestling, Body Building, Weightlifting, Tennis te an awm a ni.

Attachment