Aizawl, 21st September 2024 : Vawiin khan Pu Lalnghinglova Hmar, Sports & Youth Services enkawltu Minister chuan Thuampui Branch YMA in Thuampui Venglai Presbyterian Kohhran Hall-ah an mahni veng huamchhunga zirlai leh infiammi tithate lawmpuina leh chawimawina hun an buatsaih chu khuallian niin a hmanpui.
Pu Lalnghinglova Hmar chuan zirlai leh thalai te chawimawina program atan Kohhran Hall hman ani chu a dangdai in a hmangchang hriatthlak hle tih sawiin Pathian pawlna bakah pawh kan Hall te hi hetiang progam atan kan hman tangkai a hun hle tawh a ni, a ti. Zirlai leh infiammi te nunah a bik takin hun vawn thiam a pawimawh dante sawiin hun tha kan hmanthiam a pawimawh a, kan hun tha neih hi ho mai mai a hmang ral lova bawhpelh lo turin ka chah duh che u a ni, a ti. Hmalam hun atan zirlaite chu tun atanga an inbuatsaih tan a tul dante sawiin tih tak takna nen an thiltum tihlawtling ngei turin an rilru an buatsaih a pawimawh a, chu bakah rilru bur chatna focus neih a ngai, a ti.
Sports Minister chuan tunlai khawvelah competition a sang tawh hle tiin kan thalai te hi a ngai renga in awm a hun tawh lova, hmasawn duhna rilru in neih a ngai a, chumi atan thil in tih dan in thlak a tul anga, a kalkawng lo bibauh in lo harsa mahse beidawng lovin hma lam pan zel thin ang che u tiin a fuih a ni. Thalai kalkhawmte chu Thuampui veng danglamna thlentu leh veng timawitu ni turin a chah bawk a ni.
He hun hi Er. K Lalrinmawia, President YMA Thuampui Branch in a kaihruai a, Aux. Captain R.K. Lalnghinglova, CO Thuampui CO Bial in hunserh a hmang a, Pu K. Vanneihkima Asst. Secy. hnen atangin report ngaihthlak a ni. Pu Ricky Zonunsanga, Vice President chuan lawmthu sawiin hun kharna a hmang a ni.
He inkhawm ah hian zirlai titha mi 111 (HSLC - 44; HSSLC - 44; Graduate - 13; Post Graduate - 7 leh Diploma - 3) leh infiamna lama mi chhuanawm mi 3 te hnenah lawmpuina leh chawimawina a hlan a ni.
Attachment
