Aizawl, 8^th November, 2024: Thirsakawr hmanga India ram State 28 leh Union Territory (UT) 5 fang chhuaktu Mizo Cyclist, Vanlallawmzuala Varte (Lza Varte) lawmpuina hun vawiin khan Pu Lalnghinglova Hmar, Sports Minister chuan a Office Chamber-ah a buatsaih sak. 

Minister chuan Lza Varte chu Sports Tourism Promote-tu leh Mizoram tilartu a nihna-ah lawmthu hrilhin mi nazawng tih theih loh titheitu chawimawina hun hmang theia a awm chu lawmawm a tih thu a sawi a. Fit India leh Fit Mizoram zulzuia hetiang hlawhtlinna kan chang thei hian Mizoram thalaite Fitness lamah chona petu ni ngei se a duh thu a sawi. 

Kan taksa mai piahlamah kan rilru Fit leh Fit loh hi Lifestyle vang a nih avangin kan nunphung kan uluk a pawimawh takzet thu a sawi a. Tuna a hlawhtlinna hian thalaite-ah tumruhna leh teirei peihna pawimawhzia tuh ngei se a duh thu a sawi bawk. 

Sports Minister hian Lza lawmpui nan thilpek leh pawisa fai a hlan bawk a ni. 

Lza Varte chuan a zin chhungin India hmun hrang hranga Mizo All India Services/Central Services te'n an lo tanpuina-ah lawmthu sawiin National Highway a inkhalh thin avangin harsatna tamtak a paltlang dan a sawi  a. A zin chhung hian kalkawngah mi hrang hrang hnen atangin tanpuina sum ₹13,000/- vel a dawn thu leh a thlawnin Restaurant leh Hotel-ah te a ei thin thu a sawi. Thalaite fuihna thu sawiin Umling LA, metre 5800 chuanga sangah pawh fit taka a inkhalh theihna chhan chu a tumruhna piahlamah a hma daih atang tawha GyM leh a remchan dan ang anga a taksa leh rilru a inbuatsaih thin vang a nih thu sawiin Mizo thalaite pawh tumruhna nen an hriselna leh fitness ngaipawimawh a, hmangaih taka an taksa enkawl a, training la thin turin a chah a. Thirsakawr hmanga a zin chhunga a nupui Steffi Lalnunhimi'n a tawiawmna-ah leh moral support a pekna-ah lawmthu a sawi bakah a zin chhunga in lam atanga a chetvelna zawng zawng Internet leh Google Map hmanga lo vil a, lo ngaihven thintute chungah lawmthu a sawi bawk a ni. 

He hunah hian YMA, Cycling Association hruaitute bakah Sorkar Officials te'n thu an sawi bawk. 

Lza Varte hian January Ni 24, 2024 khan 'Ride to Clean Air' All India Cycling Tour for Awareness Campaign on clean and green sustainable lifestyle under Mission Life, Mizoram Pollution Control Board nei tur hian Aizawl atangin a inkhalh chhuak tan a. State hrang hrang 28 leh UT 5 a fan hnu, Ni 281 a thang hnuah km 17000 chuang a inkhalh a. October Ni 31 khan Vairengte lo thlengin November Ni 5, 2024 khan an chenna veng Mission Veng a inkhalh thleng leh a ni. State hrang hrangah ama hmingin thing 17 a phun bawk a ni. He a hlawhtlinna hi India book of records-ah chuankaitir dan ngaihtuah mek a ni bawk a ni. 

Sports Minister-in Lza Varte a chawimawina hunah hian Mission Veng YMA President Pu Zodinpuia Pachuau, Malsawmkima, Mizoram Cycling Association (MiCA) Advisor, Pu Frederick Malsawmzuala, MiCA Vice President, Pu Lalramsanga Sailo, Sport Secretary, Sports and Youth Services Director Pu H. Lalhmingthanga, Pu Henry Lalrawnkima Mizoram State Sports Council Secretary te an tel a. Lza Varte hi a nupuiin a tawiawm bawk a ni.

Attachment

Written by: Paul Rokima, MIS, IPRO