Aizawl, 24^th January 2024 : Sports & Youth Services Minister Pu Lalnghinglova Hmar leh Sawrkar Laipui Ministry of Sports-a Pi Secretary Sujata Chaturvedi-te chu nimin khan New Delhi-ah an inkawm.

Pu Lalnghinglova Hmar chuan Mizoram-a sports lama Sawrkarin hma thar lâk a tum dante sawiin chu mi tihlawhtling tur chuan Sawrkar Laipui puihna Mizoramin a mamawh thu a hrilh a, Sawrkar Laipui atanga puihna awm angte kan dawng zel a nih chuan a lo thlawna luang ral lovin, infiamna lama Mizoramin hmasawnna a neih belh zel thei ang a tiin Secretary a hrilh.

Sports Secretary chuan Mizoram in mamawh an thlen tawh, ama office-a châm bâng a awm a nih chuan zawng chhuak tur leh kaltlangpui a nih tur thu Minister a hrilh a, Mizoram Sawrkar ngaih pawimawh zawngte ziaka thlen turin a ngen bawk.

Sports Minister-in Mizoramah ram pum huap sports lam inrawnkhawmna hun buatsaih a duh thu a sawi chu Sawrkar Laipui puihnaa tihhlawhtlin a nih tur thu Sports Secretary hian a sawi nghal a; Mizoram chhunga sports association hrang hrangte vil ngun tura ruahmanna awm chu tha a tih thu leh naupang atanga sports kalpui tura sikul sports lam uar tha a tih thu a lo sawi bawk.

Pu Lalnghinglova Hmar chuan India-in kum 2036 Olympics thlen a tum chu lawmawm a tih thu leh, infiammi thawh ve thei ngei tura a hma thei anga ruahmanna siam an tum tur thu a sawi a, hemi kawngah hian Sports Ministry atanga puihna an mamawh tur thu a hrilh.

Attachment

Written by: Pratap Chhetri, MIS, Deputy Director 

Directorate OF Information & Public Relations

Government of Mizoram