Dated Aizawl, the 6^th of October, 2026: Vawiin chawhnu dar 3:00 khan Pu Lalnghinglova Hmar, Sports Minister hovin a office chamber-ah ‘Winter Run Mizoram’ neih dan tur chungchang sawiho a ni. Winter Run chu December ni 12 (Inrinni) zan dar 8:00 ah Lammual atanga tlan chhuah nise a ti a. Inelna ni lovin rilru leh taksa hriselna chawilar nan, ‘Fun Run’ anga buatsaih nise tih a ni. 

Sports Minister Pu Lalnghinglova Hmar chuan, ‘Winter Run Mizoram’ chu Winter Festival khuhhawnna atan ruahman a nih thu a sawi a. “Winter Festival khuhhawnna’n thil danglam leh mipui nawlpui tel theihna, taksa invawn leh hriselna promote thei ni bawk si buatsaih kan duh a, chutiang tur chuan Winter Run Mizoram hi ruahman a ni. Thalai leh nu leh pa a tam thei ang ber tel turin kan sawm.” a ti.

Vawiina meeting chuan December ni 12 (Inrinni) zan dar 8:00 atanga tan turin a rel a. Lammual atanga Sikulpuikawn thleng kawng chunga tlan in, a let lamah kawnghnuaiah Zodin atangin Chanmari an tlan tlang ang a, Chanmari atangin Lammualah let leh tur a ni ang. A pumpuiah kilometre nga tlan tura ruahman a ni. Zana tlan tur a nih avangin kum 14 chin chunglam an tel thei dawn a, a aia naupang tel duh an awm chuan nu leh pa emaw, guardian in an telpui thei ang. 

‘Winter Run Mizoram’-ah hian registration fee Rs. 100/- a awm dawn a. Intlansiak zawhah hian Lammualah fitness hmanga inelna hrang hrang, ‘post run contest’ buatsaih niin lawmman a awm dawn a ni. Zaithiamte nen concert nuam tak hmanga khar a ni ang. 

Vawiina meeting-ah hian Pu K. Lalthawmmawia, Commissioner & Secretary, Sports & Youth Services Department, Pu Henry C. Lalrawnkima, Secretary, Mizoram State Sports Council (MSSC), Department officer te bakah Mizoram Athletics Association leh A-City Run Club hruaitute an tel a ni.

Attachment