Aizawl, the 19th of March, 2025: Vawiin chawhnu dar 2:00 khan Pu Lalnghinglova Hmar, Minister of State, Sports & Youth Services Department hovin Assembly House-a Deputy Speaker room-ah Mizoram hockey hmasawnna’na hmalak dan tur hrang hrang sawiho a ni. He hunah hian Deputy Speaker & Kolasib bialtu MLA ni bawk Pu Lalfamkima, Lunglei West bialtu MLA Pu T. Lalhlimpuia leh South Tuipui bialtu MLA Pu Jeje Lalpekhlua te bakah Olympian Lalremsiami leh Hockey Mizoram hruaitute an tel a ni.
Sports Minister Pu Lalnghinglova Hmar chuan Hockey chu Mizote tan Olympic Games hnaih theihna game a ni a, Mizoram sawrkarin pawhin tih tak takin kalpui a tum tih a sawi a. “India in Olympic 2036 thlen a tum a, Mizoram pawhin tel ngei kan tum. Thenzawlah chauh mumal taka hmeichhe hockey kalpui a ni chungin India team-ah Mizo hming a lang thei reng hi a lawmawm a, talent kan nei tih a chiang hle. Hockey chu India thatna game a nih bawk avangin beiseina kan nei a ni” a ti. Mipa game pawh nasa zawka ngaihsak tum a nih thu a sawi bawk.
Vawiina meeting-ah hian hockey khelhna tur hmun tam zawk neih a pawimawh thu sawiho a ni a. Lunglei West AC huam chhung Hauruang-ah PMJVK kaltlangin Artificial Hockey Turf phah project kalpui mek a nih thu leh, tun sawrkar hun chhungin Hnahthial-ah Hockey turf phah ngei tum a nih thu tarlan a ni. Kolasib Diakkawn in Hockey khelhna atan an field an pe chu lawmawm tiin, remchang hmasaah turf phah tura ngaihtuah a nih tur thu tarlan a ni bawk. Heng bakah Muallungthu leh Kawnpuia hockey turf-te pawh tha taka enkawl a tul thu sawiho a ni.
Pu Lalnghinglova Hmar chuan ‘Empowering Mizoram Sports (EMS)’ kaltlangin Mizoram pum huap sports coaching leh talent development kalpui thuai a ni dawn a, Hockey pawh EMS hnuaia sports discipline ngaihpawimawh zingah a tel tih a sawi. Player te hmasawnna’n coaching mumal kalpui a pawimawh thu a sawi bawk.
Indian Hockey Women player, Olympian ni bawk Lalremsiami chuan Hockey hmasawnna tura sawrkar hmalakna leh hmachhawp hrang hrangte chu lawmawm a tih thu a sawi a, “Sawrkarin min ngaihsakna a lawmawm a, player leh association te tan pawh chona a ni. Sawrkarin min phurpui phawt chuan hmasawnna kan hmu ngei ang.” a ti.
Hockey Mizoram hruaitute pawhin inkawmna hun tha tak siamsaktu Sports Minister chungah lawmthu an sawi bawk a ni.
Attachment
