Aizawl 1st April 2022: Nimin ni 31.3.2022 khan Sports Minister Pu Robert Romawia Royte chu a thlenna Mumbai-a a thlenna Hotel JW Marriot-ah Srinath Narasimhan, CEO, TATA Trusts chuan tlawhin Mizorama infiamna hmasawnna tura TATA Trust te nena thawhhona leh hmalakna chungchanga inkawmna an nei a.
Pu Robert Romawia chuan Tata Trusts te nena MoU an sign angin April thla atang hian Mizoram district 11 tuam kimin khaw 60-ah Football zirna kalpui tan a nih tur thu leh hemi atan hian Coach pawh lak an nih tawh thu a sawi a. Mizo naupangte tana Tata Trust puihnaa Badminton zirna siamthat leh siam thar dan tur chungchanga thil pawimawh dangte an sawi dun bawk a ni.
Nimin tlai vek khan Pu Robert Romawia chuan Mumbai Mizoram House-a Cancer veite leh anmahni awmpuitute chu zanriah a buatsaihsak a, damlo leh damlo awmpuitu mi 30 laiin hlim takin zanriah an kilho a ni. Mumbai Mizoram House-a awmte chuan Minister hnenah hian an harsatna leh mamawhte an lo thlen a. Minister chuan a thian thate nen thawhkhawmin an mamawh zualpui phuhruk nan Rs 3,00,000/- a pe dawn a ni.
Damlote puala zanriah kilhona hun hi Pu H.Lalruatliana, DRC-in a kaihruai a, Pastor Nghaklianmawia'n hunserh a hmang a ni. Mumbai Mizoram House-a awmte chuan Pu Roberta’n Mumbai a tlawh apianga damlote puala zanriah a buatsaih thin chu lawmawm an tiin damlote awmna room leh mamawh leina tur sum fai a ngaihtuahsak dawn avang pawhin lawmthu an sawi a. Mumbai Mizo Welfare Association President Pu David Sinate leh Mizoram House staff te an tel a ni.
Attachment
