Aizawl, the 3rd December, 2020: Sports Minister Pu Robert Romawia Royte chuan Chawngte Football Ground-a AstroTurf (Phullem) phah hna tanna tur lungphum a phum.
Sports Minister Pu Robert Romawia Royte chuan Pu Zoramthanga Chief Minister kaihhruai sorkarin a lo tiam tawh anga hmun harsa leh kilkhawr zawk tihhmasawn zel a tum thu a sawi a.
Chawngte khawpui chu hnam hrang hrang leh tawng hrang hrang hmangtute chenna a ni a, inngeih taka khawsaa a tha zawnga inel turin a fuih a. Chawngte khawpui chu hnam tinte hlimna khawpui nizel se a duh tih a sawi a ni. AstroTurf Football ground chu Chawngte thalaiten football a hmasawnnan tangkai taka an hman a rinthu sawiin hnam hrang hrang thalaite inpumkhatna leh inngeihna tizualtu anih ngei a rinthu a sawi a. Chawngteah Football Academy din anih tur thu a sawi bawk a ni. Sorkarin Covid avanga sum harsatna a tawh mek lai leh mipuia sum lengvak a tlem laia Central Sorkar sum lo lut hmanga hnathawh a ni tur chu lawmawm a tih thu Minister chuan a sawi a. He project avang hian Mizoram sorkar in tax leh Labour cess ah sum a lakluh phah zawk dawn thu Minister chuan a sawi bawk a ni.
Minister chuan a enkawl ICT Department hnuaiah Chawngte leh a chhehvel High Schoolah te Computer zirna din tura sum sanction an hmuh thu leh Community Centre pawh Rs 140 lakh a Chawngte P ah sak tan thuai anih tur thute a sawi a ni.
He huna khualzahawm Pu Rasik Mohan Chakma Chief Executive Member(CEM), CADC pawhin thusawiin Astroturf Football Ground chu thalaite awh em em an neih ve phakah pawh an ngaihloh a nih thusawiin Chief Minister Pu Zoramthanga leh Sports Minister Pu Romawia Royte te duhsaknaa an chang tur chu Chawngte mipui leh CADC aiawhin lawmthu a sawi bawk a ni.
Lunglei East bialtu MLA leh Lunglei HPC Vice Chairman ni bawk Pu Lawmawma Tochhawng pawhin thusawiin thalaite awh leh mamawh em em Chawngte hmuna Astroturf Football Ground Sorkarin a siam sak tur chu a lawmpui thusawiin tangkai taka hmanga taksa leh rilru hrisel nana hmang tangkai turin a fuih a, football-ah pawh changkanna a thlen ngei ang a ti.
Technical Report petu Pu James Lalramnghaka chuan field siamnan Rs 532.50 lakh Ministry of Minority Affairs atanga sanction anih thu leh First Instalment Rs 239.62 lakh chu Mizoram sorkarah release anih tawh thu a sawi a. Chawngte-a Artificial Football Turf siam dan tur chu hetiang hian a sawifiah a ni:-
1) Football Ground – Football Astro Turf hi a dung 110 metre leh a vang 74 metre a zau a phah tur a ni a. Playing Area zau zawng hi 105 x 68 metre niin, FIFA 2 Star standard-a siam a ni anga, International Standard Goal Post dah tel nghal tur a ni bawk.
2) Pavilion – Playground sirah hian Pavilion tha tak siam tur a ni dawn a, hetah hian mi 50 vel leng thei tura ngaih niin, Player changing room pahnih (2 nos.) dah tel tur a ni bawk.
3) Security Fencing – Artificial Football Ground hi a kual chhuakin hung tur a ni dawn a. 2 metre dan zelah RCC ban dah zel tur niin, 1.2 metre a sang brick wall siam a ni anga, a chung lam 1.8 metre chu Polysteel Net hmanga siam tur a ni ang.
Attachment
